Osyndaı janaıqaı búgin Parlament Senatynyń tórinen estildi. Aıtqan – Senat depýtaty Qýanysh Aıtahanov. Bul týraly «Qamshy» portaly habarlaıdy.

Búgin Senatta Qazaqstan Respýblıkasy men Halyqaralyq damý jáne qaıta qurý banki arasyndaǵy qaryz týraly zań jobasyn talqylaý qyzý pikir-talasqa ulasty. Senatorlar kásipkerlerdi oqytý men is-saparǵa jiberý úshin de 40 mıllıon dollar qaryz alý kerek pe dep, Úkimet ázirlegen zań jobasyna qarsy shyqty.

Joǵary palata depýtaty Qýanysh Aıtahanov «Mınıstrliktiń boljamynsha bul qarajat oqytý men trenıńter ótkizý úshin jumsalady eken. Iaǵnı, qarajat jol júrý men tamaqtanýǵa baǵyttalady. Bizge qazirgi ýaqytta osyndaı nesıeler kerek pe? Búgingi jaǵdaıda bul artyq shyǵyn emes pe?»,-dep suraqty tótesinen qoıdy.

Depýtattyń júrgizgen zertteýinshe, ústimizdegi jyldyń 1 qazanyndaǵy jaǵdaı boıynsha eldiń memlekettik qaryzy 7,6 trıllıon teńgege jetken. Onyń 98,8 paıyzyn úkimet qaryzy quraıdy.

«Tek 9 aıda úkimettik qaryz valúta baǵamyndaǵy aıyrmashylyqty qosa eseptegende 1,9 trıllıon teńgege artqan. Myna túrimizben bul qaryzdardy óskeleń urpaqtyń moınyna ilip qoıýymyz múmkin»,- deıdi senator.

Mıllıardtaǵan qaryzdardy senator shaǵyn jáne orta bızneske arzan nesıe túrinde berip, ákimshilik kedergilerdi joıýdy usyndy. 

«Kásipkerlik máselelerin sheshsek, biz shetelden bulaı kóp mólsherde qaryz suramaıtyn bolamyz. Bulaı qaryz alarda memleket onyń tıimdiligi týraly da oılanýy kerek», - degendi qosa aıtty.

Dál osy zań jobasy tómengi palata depýtattarynyń da narazylyǵyn týǵyzǵanyn esterińizge salamyz. Ulttyq ekonomıka mınıstri Erbolat Dosaevtyń aıtýynsha, bul memlekettik búdjet esebinen tólenetin jalǵyz qaryz emes kórinedi. Soǵan qaraǵanda, el Úkimeti kez-kelgen qaryzdyń «kúlip kelip, jylap qaıtatynyn» túsine qoımaǵan syńaıly.

Darhan Muqan