Fonogramǵa jany qas dástúrli ánshi Erkin Shúkiman búginde shoý-bızneste “ánshi symaqtardyń” kóbeıip ketkenine kúıinedi. Bul týraly "Qamshy" portaly 31 arna-ǵa silteme jasaı otyryp habarlaıdy.

Búginde kompúterdiń “qudiretimen” bulbulǵa aınalyp, halyqtyń “ystyq yqylasyna” ıe bolyp júrgen ánshiler qazaq estradasynda jeterlik. Tipti, fonogramny olar tyǵyryqtan shyǵýdyń eń ońaı joly dep sanaıdy.

«Án aıtsań, janyńdy jep aıt». Osy qaǵıdany dástúrli ánshi Erkin Shúkiman berik ustanǵan. Sondyqtan bolar, sahnada oryndaıtyn ánderin osy kúnge deıin kompúterdiń kómegimen aıtyp kórmepti.

Fonogramǵa jany qas óner ıesi búginde shoý- bızneste “ánshi symaqtardyń” kóbeıip ketkenine kúıinedi. Egerde olardy naǵyz dodaǵa salyp synap kóretin bolsa, birazy ónerden syrylyp qalatyna da senimdi.

Dástúrli ánshi arnaıy zańnyń bolýyn talap etse, al tanymal ónertanýshy Erlan Tóleýtaı búgingi qazaq estradasynyń deńgeıine kóńili tolmaıtynyn baspasóz betterinde ashyq bildirgen. Tipti, fonogrammen án aıtýdy – haram dep kesip aıtty.

“Fonogrammen án aıtý- haram! Dıskige jazylyp alynǵan daýysqa ilesip sahnada aýyz jybyrlatyp turǵannyń nesi óner? Túptep kelgende, bul halyqty aldaý, haram jolmen aqsha tabý ǵoı. Fonogrammen án aıtý óner emes!”, – deıdi Erlan Tóleýtaı.

TMD elderiniń barlyǵy fonogramǵa álde qashan tyıym salǵan. Alaıda, bul qatarǵa Qazaqstan enbeı otyr.

Zertteýshiniń aıtýynsha Germanıa, Qytaı syndy elderde sahnada ótirik aýzyn jybyrlatyp, halyqty aldasa joǵary kólemde aıyppul tóleıtin kórinedi.

Eýropada fonogram degen uǵym atymen joq. Tipti, kórshi qyrǵyzdardyń ózi bas tartqan. Al, Amerıkada oǵan ruqsat bar, biraq shyǵarmashylyq konsertterdiń afıshasynda «fonogram» degen eskertpe mindetti túrde jazylyp turady eken.

Al, dástúrli jáne estrada ánderin qatar shyrqaıtyn Aıgúl Qosanova fonogramdan bas tartý úshin áli 20 jyldaı ýaqyt qajet degen pikirde. Sebebi, toı men konsertterde kóbinese ánshiden óńdelgen ánderin suraıtyn kórinedi.

“Televıdenıede fonogram surap jatady. Ol nelikten dep oılaısyz biz mysalǵa dombyramen án aıtýǵa barsaq mindetti túrde dombyramen án aıtatyn adamnyń oıynda men fonogram alyp baramyn degen oı bolmaıdy. Eger shaqyrsa tirideı án aıtamyn dep baramyn”, – deıdi Qosanova.

Kompúterdiń kómegimen óńdelgen ándi oryndaǵan ánshiniń daýysymen sheberligin bilýge bolady.

Alaıda, ánshi Mádına Sádýaqasova jandy daýysta aıtýdan ket ary emes. Kelesi jyly jandy daýysta jeke konsertin ótkizýdi kózdep otyr.

“Fonogramsyz konsertterdiń barlyǵyn ótkizý kerek. Óıtkeni seniń konsertińe halyq keldi me, kórermen mindetti túrde jandy daýysty tyńdaý kerek. Al, keıde kóptegen túsirilimder men jobalar bolady olar fonogramda ótý kerek”, – deıdi Sádýaqasova.