Qytaıdaǵy keń tanymal WeChat áleýmettik jelisiniń «Qorǵas jańalyqtary» betinde Qazaqstandaǵy demografıalyq ahýalǵa toqtala kele, eldegi erler sany áıelderden áldeqaıda az ekendigin aıtyp, qazaq qyzdaryna «quda túsýge» shaqyrǵan jazbalar taraýda. Bul týraly «Qamshy» portaly habarlaıdy.
2355858201 nómirli WeChat qoldanýshysy «Qazaqstan Men Jýngo – (Qytaı Halyq Respýblıkasynyń qytaısha ataýy – red.) ejelden tatý-tátti kórshiler. Eki el arasynda tyǵyz baılanystar ornaǵan. Búginde Qazaqstanda áıelder sany erlerge qaraǵanda basymdyqqa ıe. Sol sebepti de qytaılyq erkekter úshin eki el arasyndaǵy baılanys Qazaqstanǵa baryp, qazaq qyzdaryna úılenýge erekshe múmkindik bolyp otyr. Qazaqstan kóshelerinde sulý qyzdar kóp. Bir erkek onda tórt áıelge deıin alýyna bolady. Alaıda, erkekteriniń kóp áıel alýǵa jaǵdaılary joq. Bul – qytaılyq er azamattar úshin úlken múmkindik» delingen ol jazbalarda.
Sondaı-aq, jeli qoldanýshysy Qazaqstandaǵy Almaty oblysynyń aýmaǵyna da kóz alartqan. Onyń oıynsha, «Qazirgi Almaty qalasynyń ornynda buryn Shıanshı qystaǵy bolǵan».
Osy jazbalar Qytaıda turatyn qandastarymyzdyń arasynda qyzý talqylanyp, narazylyq týǵyzýda. Osy máselemen Qytaı quqyqqorǵaý organdary aınalysyp jatqandyǵy týraly da aıtylady.
