«Jetinshi arna» men ARAI Media stýdıasy «Ómir synaǵy» jáne «Shalǵaıdaǵy oqıǵa» atty eki jańa telehıkaıanyń tanystyrylymyn ótkizdi. Atalǵan jobalar otandyq kınodaǵy sapaly ári reıtıńi joǵary jobalardyń qataryn tolyqtyrady dep josparlanyp otyr.

Qazaqstandyq kınematograf mamandary otandyq telehıkaıalardyń sheteldik televızıalyq ónimdermen  básekede oza shaýyp, naryqty jaýlap ala alatyndyqtaryna senetindikterin jetkizdi.

Telehıkaıalardyń bas prodúseri Danıar Jánibekovtyń aıtýynsha, joba avtorlary qoǵamdaǵy ózekti máselelerdi kóterip, otansúıgishtik, áleýmettik jaýapkershilik sekildi qundylyqtarǵa mán bergen.

«Máselen, «Ómir synaǵy» telehıkaıasynda múmkindigin shekteýli jandardyń tolyqqandy ómir súrý quqyǵy bar ekeni sóz bolsa, «Shalǵaıdaǵy oqıǵa» jobasynda Otanyńdy maqtan etip, aýylyńnyń kórkeıýine, týǵan jerińniń gúldenýine úles qosý taqyryby tilge tıek etiledi», - deıdi ol.

«Ómir synaǵy» telehıkaıasynyń rejıseri Qanaǵat Mustafın qazirgi qoǵamdamúmkindigi shekteýli jandardyń erkin júrip-turýy shekteýli ekenin toqtaldy.Onyń aıtýynsha, «Ómir synaǵy» dál osy máselege kórermenderdiń nazaryn aýdartady.

«Telehıkaıadaǵy bas keıipker adam qolynan jasalǵan qastandyqtyń saldarynan Allanyń adamǵa bergen syıynyń jartysynan aırylǵan adam. Soǵan qaramastan, ol ómir súrýge qushtar, bolashaǵy úshin kúresedi», - dep oıymen bólisti ol.

Osy telehıkaıada zaǵıp jigitti oınaǵan Almas Shaıahmetov qazirgi kezde qoǵamda múmkindigi shekteýli jandarǵa degen kózqarastyń ózgergenin baıqaıtyny týraly aıtty.

«Buryn «múgedek» degen sózdi oılanbaı aıta salatyn bolsaq, qazir «erekshe qajettilikteri bar adamdar» dep sóıleıtin boldyq. Osynyń ózi – ol adamnyń bizden eshteńesi kem emes ekenin, onyń bizge uqsamaıtyn jeri tek boıyndaǵy sol bir ózgesheligi ekenin jáne ol soǵan múlde kináli emes ekenin moıyndaý», - deıdi ol.

Rejıser Mádına Álimhan «Shalǵaıdaǵy oqıǵa» telehıkaıasyndaǵy Eldostyń tarıhy kópshilikke úlgi bola alatyny jaıly jetkizdi.

«Moıymaı, qajymaı, týǵan aýylyn kóterýge bel býǵan bas keıipkerdiń mysalynda jat ólkede emes, kindik qanyń tamǵan elde baqytty bolýǵa bolatyndyǵyn kórýge bolady», - dedi ol.

«Ómir synaǵy» telehıkaıasy 2015 jyldyń 23 qarashasynda 20.00-de, al «Shalǵaıdaǵy oqıǵa» 21 jeltoqsanda«Jetinshi arna» efırine shyǵady.

Jobalar Qazaqstan Respýblıkasy Investısıalar jáne damý mınıstrligi Baılanys, aqparattandyrý jáne aqparat komıtetiniń qoldaýymen túsirilgen.