Qazaqstan Fýtbol federasıasynyń prezıdenti Erlan Qojaǵapanov Aısultan Nazarbaev pen barlyq fýtbol janashyrlaryn Respýblıkalyq Fýtbol forýmyna qatysýǵa shaqyrdy. Bul týraly «Qamshy» portaly Erlan Qojaǵapanovtyń facebook áleýmettik jelisinde jarıalaǵan hatyna silteme jasap habarlaıdy.
Erlan Qojaǵapanov fýtboldyń búgingi jetistigi bir kúndik jumystyń nátıjesi emes, maǵan deıingi basshylardyń eren eńbegi dep málimdedi. Naqtyraq aıtsaq ol ÝEFA-ǵa múshe bolyp, «Sesna» fýtbol akademıasy qurylǵanyn tilge tıek etti. Sondaı-aq, federasıa basshysy Aısultan Nazarbaevqa qatysty óziniń pikirin bildirdi.
– Maǵan Aısultan Nazarbaevtyń bastamasyna kózqarasyńyz qalaı degen suraqty kóp qoıady. Aısultannyń qazaqstandyq fýtboldyń damýyna qyzyǵýshylyq tanytqany árıne qýantady. Onyń bastamasy kóptegen adamdardyń fýtboldyń búgingi jaǵdaıyna kóńil aýdarýyna sebep boldy. Maǵan onyń ashyq, jarıa túrde óziniń pozısıasyn bildirgeni unady. Ol basqa kúshterdi qoldaný arqyly maqsatyna jete alar edi, biraq ol qoǵammen ashyq baılanys ornatý arqyly durys jol tańdady dep bilemin. Biz onyń fýtboldyń damýyna birlese jumys atqarýyn qalaımyz, – dedi Erlan Qojaǵapanov.
Sondaı-aq, Erlan Toqtarhanuly qazaq fýtbolynda jedel sheshimdi qajet etetin kóptegen máselelerdiń bar ekenin jasyrmady. Máselen, ol balalar men jasóspirimder fýtboly áli de damytýymyz qajet etedi degen pikirde. Budan bólek Erlan Qojaǵapanovty manejderdiń jetkiliksizdigi men barlyq deńgeıdegi jattyqtyrýshylardyń azdyǵy oılandyrady. Sondyqtan da ol Astanada 21 qarasha kúni ótetin Respýblıkalyq Fýtbol forýmǵa barsha azamatardy shaqyryp otyr.
