Tanymal ártis Bekjan Turys kórermenderge «Ulym, saǵan aıtym...» atty monospektakl usynbaq. Bul týraly «Qamshy» portaly M. Áýezov atyndaǵy akademıalyq drama teatrynyń baspasóz qyzmetine silteme jasap habarlaıdy.
«Áke – balaǵa synshyl», baýyr eti balasynyń qýraı basyn syndyrmas qýys keýde bolyp óspeı, ekran ishinde esirgenderge eliktemeı, uıada sińirgen uıatyn saqtap, áýlet abyroıyn asqaqtatyp, áleýmettiń jaıyn oılar azamat bolyp óskenin qalaıdy. Al, bala qashan da jańaǵa umtylady.
Áke men bala arasyndaǵy tartystyń tamyrlanýynan tek qana túsinistik pen meıirim ǵana saqtap qalady. Sanaǵa syımaıtyn saýaldarynyń jaýabyn jeteli bala eń aldymen ardaq tutqan ákesiniń bolmysynan tabady. Adamgershilik, qaıyrymdylyq, eljandylyq, ultyna qyzmet qylý degen arda uǵymdar balaǵa teorıamen túsindirilmeıdi, úı ishinde úlkenderdiń úlgisimen sińetin abzal qasıetter. Búginde úlken minberlerden baıybyna jetip, tereńine boılamaı aıtyla salatyn «ult, ulttyq oı, ulttyq qundylyq» degen kólgirsýlerden góri, osy bir úrkek uǵymdardy uıadaǵy balasyna erte bastan uǵyndyryp, joǵatqandy túgendep, bardy baǵalaýǵa úıretetin, óz armany men maqsatyn eldik muratpen ushtastyrýǵa úndeıtin áke tilegi men keleshegin kóńil túkpirinde ózgeshe keıiptegen bala kózqarasy árqashan sabaqtas bolsa ıgi. Keshegige qaraılaýdan góri jańanyń jetegimen júrýdi jón kóretin, bilim men bilikke kóbirek súıengen búginginiń kóshbastar býynyna ıba men ıman qatar sińse, birlikti berekem dep tanysa, qatardan qalmasymyz anyq.
Erdiń jasy 50-ge kelip jatqan teatrdyń talantty artısi, sahna saıypqyrany Bekjan Turys ult degende ulaǵatty sóz aıtýǵa umtylatyn sergek oıly azamattardyń biri retinde, «Ulym, saǵan aıtam» atty mereıtoılyq monospektakl ótkizip, balasy Maǵjan ekeýi mártebeli kórermenine maǵynaly kesh syılaıdy. Óner qonǵan júreginiń shyryly azamattyq kózqarasy bolyp aıqyndalǵan Bekjan bul keshin ánmen ádiptep, jyrmen kómkerip, qadirine boılaǵan qazaǵyn Maǵjan ekeýi qaıyra bir serpiltpek. Kesh M.Áýezov atyndaǵy akademıalyq drama teatrynda 6 jeltoqsan kúni ótpek.
