Endi ne bári bir jarym jyldan keıin elimiz halyqaralyq EXPO-2017 kórmesin ótkizedi. Alaıda, qoǵamda áli kúnge deıin atalǵan aýqymdy sharaǵa qatysty ártúrli áńgimeler aıtylyp jatqany jasyry emes. Máselen, bir top azamattar «halyqaralyq kórme ótkizý elimiz úshin tıimsiz» dese, kerisinshe, ekinshi tarap «EKSPO-dan eselep paıda kóremiz» degendi alǵa tartyp otyr. Áıtse de qazirgi tańda osyndaı pikir talastarǵa qaramastan halyqaralyq kórmege qyzý daıyndyq jumystary júrip jatyr.

Sonyń bir dáleli bolsa kerek, kúni keshe Memleket basshysy Nursultan Nazarbaev «Astana Ekspo-2017» ulttyq kompanıasynyń tóraǵasy Ahmetjan Esimovty qabyldady. Ahmetjan Smaǵululyn qabyldaǵan prezıdent «EKSPO-2017» halyqaralyq kórmesine daıyndyq aıasynda ulttyq kompanıaǵa zor jaýapkershilik júkteletinin aıtty. Sondaı-aq, prezıdent qoıylǵan mindetterdiń aýqymdylyǵyn aıta kele, olardy der kezinde jáne sapaly júzege asyrý qajettigin Esimovtyń esine saldy.

Al, Ahmetjan Esimov bolsa atqarylyp jatqan jumystar men aldaǵy kezeńge arnalǵan josparlary týraly baıandady. Sondaı-aq, ol prezıdentke  «Eksponyń» basty nyshany bolýy tıis shar tárizdes alyp ǵımaratqa 3 birdeı at oılastyryp kelgenin aıtty. Ahmetjan Smaǵululy alyp shardy «Nur álem», «Nurly álem» nemese «Álem nury» dep ataǵan jón dep esepteıdi. Alaıda, Memleket basshysy Nursultan Nazarbaevqa kompanıa tóraǵasynyń jaǵympazdyqpen jasalǵan usynysy múlde unaǵan joq.

– Men eki ataýdy usynamyn. Birinshisi, «Álem shar». Al seniń aıtyp otyrǵanyń «Nur álem». Bul mańyzdy emes. Biraq «Álem shar» desek durys bolady. Shar degen aty ózi aıtyp tur ne ekenin. Álem degen dúnıe. Jer sharynyń bárin ishine kirgizip otyrmyz. Al sen «Nur álem» deısiń. Endi tańdaıyq, – dedi prezıdent.

Alaıda, prezıdent alyp shardyń ataýyn qalaı ataý týraly oılanaıyq dedi. Demek «Eksponyń» basty nyshany «Álem shar» emes, múlde basqa ataýǵa ıe bolýy múmkin. Osy rette atalǵan nysandy «Ǵalam shar» dep ataý qulaqqa jaǵymdy bolar edi dep esepteımiz. Óıtkeni «Álem shardan» qaraǵanda «Ǵalam shar» degen tirkes burynnan qoldanysta bar. Alaıda eks-ákim prezıdenttiń qabyldaýynda «Eksponyń» basty nyshanyn «Álem shar» emes, «Ǵalam shar» dep ataıyq» dep aıtpady. Bálkim óziniń «Nur álem» degen ataýy nazardan tys qalǵanyna ókpelegen shyǵar. Bul jaǵy belgisiz.

Biraq bir belgilisi sońǵy kezderi prezıdent «Nurǵa» qatysty jaǵympazdanyp usynys tastaǵandardy jaqtyrmaı júr. Máselen buǵan deıin prezıdent «EKSPO» qalashyǵy aıasynda salynatyn saýda ortalyǵyn «Nur Plaza» dep ataıyq» degen Nurlan Smaǵulovtyń usynysyn qabyldamaı tastaǵan bolatyn.

– Sol «Nur-Plaza» dep ataǵymyz keledi. Eger kelisim berseńiz jaqsy bolar edi.

– Osylaı jalpaqtaýdy qaıdan úırenip júrsińder?

– Ómir úıretip jatyr...

– Jaraıdy, «Astana-Plaza» bolsyn. Biraq, álde de oılanaıyq.

Bul Memleket basshysy Nursultan Nazarbaev pen belgili kásipker Nurlan Smaǵulovtyń arasyndaǵy dıalog. Sóz sońynda prezıdent Esimovke aıtqandaı «Jaraıdy, «Astana-Plaza» bolsyn. Biraq álde de oılanaıyq» degen bolatyn. Mine sodan keıin ili-shala atalǵan saýda ortalyǵyna «Jibek Joly» degen ádemi ataý berildi. Sol sıaqty prezıdent «Álem shar» dep ataıyq» degen nysan «Ǵalam shar» bolyp ózgerse nur ústine nur bolar edi. Bul árıne «Álem shardan» qaraǵanda «Ǵalam shar» degen at ádemi estiledi degen usynys qana.

Joǵaryda halyqaralyq EXPO-2017 kórmesine qatysty qoǵamda ártúrli áńgimeler aıtylyp jatqanyn tekten tek tilge tıek etken joqpyz. Óıtkeni bilikti sarapshylar Qazaq eliniń endigi ekonomkıalyq damýy halyqaralyq kórmeni qaı deńgeıde ótkizgenge baılanysty degen pikirde. Mine osyny bile tura Ahmetjan myrza prezıdentke jaǵympazdanýdy birinshi orynǵa qoıyp otyrǵan sıaqty. Alaıda ol jaǵympazdaný jarysynda «Nurlandyrý» ádisiniń eskirgenin esten shyǵaryp aldy.

Serik JOLDASBAI

Astana