Aq Ordada úsh saǵat boıy Úkimet múshelerimen keńeıtilgen keńes ótkizgen Elbasy Nursultan Nazarbaev mınıstrler kabınetine mańyzdy mindetter artylyp otyrǵanyn aıtty. Bul týraly «Qamshy» portaly habarlaıdy.

Jıynda negizgi áńgimege el Úkimetiniń ekonomıkalyq daǵdarys jaǵdaıyndaǵy jumysy arqaý boldy.

«Áreket etetin, qyzyqty ýaqyt keldi. Reformalar ýaqyty, eldi, ekonomıkany jańa satyǵa kóshiretin ózgerister ýaqyty. Sondyqtan da, senderdiń kózderi osy jumys dep janyp turýy kerek. Sender úlken ózgerister jasaıyn dep tursyńdar. Qaz balapandarynyń qanaty shyqqanda ıyqtary aýyrady. Mine, biz osyndaı sátte turmyz. Ári qaraı ushýymyz úshin osy aýyrtpalyqqa shydaýymyz kerek» dedi Elbasy Úkimet múshelerine qarata.

Osylardy aıta kele, Elbasy búginde barlyq álem bastan keship otyrǵan ekonomıkalyq qıyndyqtarǵa qaramastan, qazaqstandyqtardyń jumys isteýge qajetti múmkindikterge ıe ekenin, bastarynda baspanalary, astylarynda kólikteri, ústelderinde jeıtin astary bar ekenin de atap ótti. Jaqynda ǵana Qazaq handyǵynyń 550 jyldyǵyn atap ótilgeni týraly sóz etip otyryp, mádenıet mınıstrinen: «Buryn qalaı ómir súrdik, qazir qandaımyz?» dep surady. Bul suraqqa Arystan Muhamedıuly: «Qazir qazaqstandyqtar baqytty shaqta ómir súrýde» dep kesip jaýap berdi.