Búgin Almaty qalasynyń ákimi Baýyrjan Baıbek qaladaǵy bıznes qaýymdastyq ókilderimen kezdesti. Jıyn barysynda qalanyń 2016-2020 jyldarǵa arnalǵan damý baǵdarlamasy talqylandy. Bul týraly «Qamshy» portaly QazAqparatqa silteme jasap habarlaıdy.

«Ekonomıkanyń eń mańyzdy bóligi  SHOB ókilderi. Jańa baǵdarlamany sizdermen talqylaýǵa bel býdyq. 100 naqty qadamdy SHOB sýbektilerinsiz júzege asyrý múmkin emes. Osy ýaqyt aralyǵynda 60 mańyzdy zań qabyldandy. Bıznesti júrgizý, áleýmettik standarttar, sharttardy júzege  asyrý úshin asa mańyzdy zańnamalyq qujattar qabyldandy. Táýelsizdiktiń alǵashqy jyldarynda jan basyna shaqqandaǵy JİÓ 600 AQSH dollary edi, Qazir almatylyqtardyń jan basyna shaqqandaǵy JAÓ 29 myń AQSH dollary bolyp otyr. Bul kórsetkish 20 jylda 17 ese ósken», - dedi B.Baıbek.

Onyń aıtýynsha, álemdegi kúrdeli ekonomıkalyq jaǵdaı Almatyǵa áserin tıgizbeı qoımaıdy.

«Keler jyly qala búdjeti 20 paıyzǵa qysqarýy ǵajap emes. Sondaı-aq, salyqtyq baza azaıýy múmkin. İskerlik belsendilik túsedi degen boljam bar. Biraq, biz damý baǵdarlamasyn júzege asyrýǵa qajetti resýrstardyń barlyǵy bar ekendigine ábden kóz jetkizdik», - dedi ol.

Qala ákimi Almatynyń sımvoly bolǵan alma baqtaryn qaıta qalpyna keltirýdi usyndy.

«Burynǵy Almaty esterińizde me? Móldiregen aryqtar. Iisi ańqyǵan almalar. Qazir qala mańyndaǵy taý bókterleriniń bári jeke qolǵa ótip ketken. Biraq, aınalysam degen bıznesmen bolsa, biz olardy taýyp, jer bólýge tyrysamyz», - dedi qala ákimi.

Aıta ketý kerek, qala damýynyń 2016-2020 jyldarǵa arnalǵan baǵdarlamasyn jasaýǵa «McKinsey&Company» kompanıasynyń sarapshylary tartyldy.

Baǵdarlama jobasy almaty.gov.kz saıtynda jarıalanǵan. Qala turǵyndary kelesi aıǵa deıin usynystaryn almaty2020@a-a.kz elektrondy mekenjaıyna jibere alady.

 «Almaty-2020» baǵdarlamasynda damýdyń 7 negizgi baǵyty qarastyrylǵan: jaıly qala, qaýipsiz qala, áleýmettik qala, ekonomıkalyq turaqty qala, jeke kapıtal men bızneske jaıly qala, belsendi azamattar qalasy, beıimdelgen qala.