Qazaqstan Prezıdenti Nursultan Nazarbaev bazarlarǵa baryp, sórelerde qazaqstandyq taýarlardyń qanshalyqty qoıylyp otyrǵandyǵyn teksermek. Bul týraly búgin Elbasy Aqordada ótken Úkimettiń keńeıtilgen otyrysynda málim etti,- dep habarlaıdy «Qamshy» portaly QazAqparatqa sileme jasap.

«Bizde óndirilip otyrǵan taýarlarǵa baǵany ósirýge qandaı negiz bar?! Bizde birneshe ımporttyq pozısıalar ǵana qaldy, kóp emes.  Qant jetpeıtin, alaıda bıyl Almaty, Jambyl oblystary qanshama qant qyzylshasyn óndirdi. Qant óndirisi 25 paıyzǵa artyp, ony syrttan tasymaldaý tómendedi», - dep toqtaldy Elbasy.

Osy oraıda N. Nazarbaev QR Aýyl sharýashylyǵy mınıstri Asyljan Mamytbekovke qaratyp aıtqanda elimizdegi óńdeý salasyn damytýǵa jeke jaýap beretindigin qadap aıtty. «Men ózim bazarlarǵa baryp, bizdiń taýarlardyń qalaı ózgergenin qaraıtyn bolamyn. Birinshi qajettiliktegi taýarlardy baqylap otyryńdar. Olardyń baǵasy artpaýy kerek», - dedi Elbasy.

Prezıdent áleýmettik mańyzy bar kóptegen taýar túrleri boıynsha baǵanyń ósýi baıqalyp otyrǵanyn atap ótti. «Osyǵan baılanysty Úkimet pen ákimder birinshi qajettiliktegi taýarlardyń baǵalary boıynsha monıtorıń jumystaryn jandandyrýy kerek, ásirese azyq-túlik taýarlaryna qatysty. Qajet bolǵan jaǵdaıda halyqtyń az qorǵalǵan toptaryna ataýly áleýmettik kómek arqyly qoldaýdy qamtamasyz etý kerek», - dedi Prezıdent.