Elbasy N. Nazarbaev Úkimettiń keńeıtilgen otyrysynda «Qazmunaıgaz» Ulttyq kompanıasynyń basshysy Saýat Myńbaevtan janar maı baǵasynyń ósý sebebin túsindirýdi surady. Bul týraly «Qamshy» portaly habarlaıdy.

«Qarapaıym adamdarǵa nege bulaı ekenin túsindirshi. Munaı baǵasy úsh ese tústi, al janarmaı beketterinde benzın baǵasy ósip barady. Qarapaıym sharýaǵa qarapaıym tilmen túsindirshi» dedi Prezıdent. Saýat Myńbaev muny Reseı men Belorýsıa shekarasynyń ashyqtyǵymen túsindirdi. Onyń aıtýynsha, bul elderde benzın qymbattaý, sondyqtan Qazaqstan olarmen baǵany teńestirýge májbúr.

«Bizde Reseı men Belorýsıamen aıyrmashylyq bolýy múmkin emes. Olarda qandaı baǵa bolsa, bizde sondaı, tek keı jerde 5-7 paıyzǵa aıyrmashylyq bolýy múmkin. Biz buǵan deıin baǵany ustap keldik, keıde Reseıden 40 paıyzǵa tómen boldy. Nátıjesinde soltústik oblystardyń barlyǵy benzındi Reseıge tası bastady», -dedi Myńbaev.

Ol sondaı-aq benzın baǵasy az ǵana ósti dep esepteıdi. «Biz baǵany az ǵana kóterdik. Qazir 135, buǵan deıin 110 bolǵan»,-dedi ol.

Nazarbaev Premer-mınıstrdiń orynbasary Baqytjan Saǵyntaevqa bul máseleni Evrazıalyq odaq komısıasynyń otyrysynda talqylaýdy usyndy. Al Saǵyntaevtyń aıtýynsha elimizdegi munaı óńdeý zaýyttary kúrdeli jóndeýden ótken soń, Qazaqstan ishki suranysyn ótep qana qoımaı, kórshi elderge de sata alady.

«Bizde mıllıon tonna benzın defısıt. Kórshi elderde baǵanyń qymbat bolǵandyqtan biz de kóterýge májbúr boldyq. Qajetti benzındi ózimiz óndire bastaǵan kezde olarǵa táýeldi bolmaımyz. Munaı óńdeýshiler kúrdeli jóndeý 2017 jyly aıaqtalady dep otyr. Sol kezde bizdegi tapshylyq joıylyp, naryqty qamtamasyz ete alamyz»,-dedi Saǵyntaev.

Eske salaıyq, qyrkúıek aıynda úkimet benzın baǵasyn retteýden bas tartqan edi.