Qarashanyń 27-si kúni Almaty qalasy OKJ-niń №4 kitaphanasynyń qyzmetkerleri men №128 orta mektebiniń ákimshiligi uıymdasa otyryp, Saparǵalı Ysqaqulynyń týǵanyna 120 jyl tolýyna baılanysty 5-6 synyp oqýshylaryna «Bala janynyń baǵbany» atty ádebı saǵat ótkizdi. Oqýshylarǵa jazýshynyń ónegeli ómir jolynan úlgi alýǵa shaqyrý,shyǵarmalaryn nasıhattaý, sóz ónerin qasterleı bilýge úıretý maqsatynda ótkizilgen bul ádebıet saǵat barysynda Saparǵalı Begalın jaıly kóptegen málimetter aıtyldy.
Qazaq balalar ádebıetiniń atasy, aqyn, jazýshy, aýdarmashy, tarıhshy, etnograf, dramatýrg, jalpy aıtqanda, san qyrly tulǵanyń erekshe bolmysy, ósken, bilim alǵan ortasy, artyna qaldyrǵan qazynaly mol murasy, ómir joly jaıynda «Bala janynyń baǵbany» atty vıdeoprezentasıa kórsetildi.
Ádebıet – ómir mektebi. Kórkem shyǵarmalardy oqı otyryp, biz jaqsy qasıetterdi boıymyzǵa sińire otyra, jamandyqtan jırenýdi úırenemiz. Balalar klassıginiń qaı týyndysyn alsaq ta, tereń taǵylym teńizi bolyp tabylary haq. «Symbatty Sıma», «Sátjan», «Kóksegenniń kórgenderi», «Urynshaq bala», «Esenniń kirpigi», «Aldanǵan jolbarys», «Jas butaq», «Bala Shoqan», «Mektep baǵynda» syndy týyndylarynyń mazmunyna toqtala otyryp, shyǵarma keıipkerleriniń minezderine taldaý jasalyp, oqýshylardyń pikiri tyńdalyndy.Óz kezeginde oqýshylar aqyn óleńderin tebirene oqyp, ózderi oqyǵan shyǵarmalary jaıynda oı bólisti. Qansha ýaqyt ótse de, jazýshy shyǵarmalary tárbıelikmańyzyn esh joımaq emes. Osylaı biz oqýshylardy jaqsy men jamandy saralaı bilýge, úlgili, tártipti, qaıyrymdy da qamqor bolýǵa baǵdar berdik.
Oqýshylar kórnekti qalamgerdiń ómiri men shyǵarmashylyǵy jaıly vıktorınalyq suraqtarǵa jaýap berip, bilim synyna tústi. Erekshe qabiletimen kózge túsken oqýshylarǵa arnaıy syılyqtar berildi.
Saparǵalı Begalın bir esteliginde:«Eki úlken ımperıanyń ortasynda ósip-óngen danyshpan halqymyzdyń basynan ne ótpedi deısiń. Óziniń keń baıtaq jerin naızanyń ushymen, bilektiń kúshimen qorǵaı bilgen halqymnyń aldynda basymdy ıemin» - dep tolǵanǵan edi.Ádebıetimizdiń zańǵar tulǵasy qazaǵymen máńgi birge jasamaq.
Áıgerim Hametova
