Búgin Almatyda QR Ulttyq bankiniń tóraǵasy Danıar Aqyshevtyń qatysýymen kezekti baspasóz máslıhaty boldy. Onda bas bankır qarjy naryǵyndaǵy ahýalǵa baǵa berdi, - dep habarlaıdy "Qamshy" portaly.

«2015 jyly Qazaqstanda jyldyq ınflásıa - 13,6 paıyzdy qurady. Azyq-túlik taýarlarynyń baǵasy bir jyl ishinde 10,9 paıyzǵa ósti. Al azyq-túlikke jatpaıtyn taýarlardyń baǵasy 22,6 paıyzǵa, aqyly qyzmetter 8,1 paıyzǵa qymbattady», - D. Aqyshev.

Sonymen qatar, bas bankır valúta naryǵyndaǵy aıyrbas baǵamy jóninde óz oıyn bildirdi.

«Búgin tańerteń Qazaqstan qor bırjasynda bir AQSH dollary 383,23 teńgeni qurady. Jyl basynan beri ózgeris 12,7 paıyzdy qurap,  saýda kólemi 58 mlrd. AQSH dollaryna jetti. Biz ótken jyldyń sońynda ótken baspasóz máslıhatynda teńgeniń baǵamy syrtqy faktorlarǵa baılanysty ózgerýi múmkin ekendigin eskertkenbiz. Iaǵnı, munaı baǵasy bir barel úshin 30 dollardan tómendep, Reseı rýbli 10 paıyzǵa qunsyzdandy. Sáıkesinshe, teńge baǵamy jańa deńgeıde qalyptasyp jatyr»,- dedi D. Aqyshev. 

Aıta ketelik, ótken jeltoqsan aıyndaǵy ınflásıa - 1,2  paıyz boldy. Bir jyl ishinde azyq-túlik taýarlarynyń baǵasy  22,6 paıyzǵa ósti. Azyq-túlik taýarlarynyń ishinde 2015 jyly kóbinese qant - 19,8 paıyzǵa,  balyq jáne teńiz ónimderi - 19,5 paıyzǵa, maılar men toń maı - 18,5 paıyzǵa, jumyrtqa - 18,0 kókónister men jemister - 17,3 paıyzǵa jáne makaron ónimderi -10,2  paıyzǵa qymbattady.

Al, aqyly qyzmet kórsetý - 8,1 paıyzǵa kóterildi. Azyq-túlikke jatpaıtyn taýarlar naryǵynda kıim men aıaq-kıim baǵasy 32,9 paıyzǵa, dári-dármekter 30,7 paıyzǵa, turmystyq úı zattary  24,7 paıyzǵa kóterildi.