Álemdik naryqta munaı baǵasy buryn sońdy bolmaǵan rekordtyq deńgeıge deıin arzandap jatyr. Soǵan saı munaı ónimdiriniń de baǵasy túsýi tıis edi. Munaı óndirýshi el sanalatyn Qazaqstanda da úsh birdeı munaı óńdeý zaýyty bola tura janarmaı baǵasy qymbat kúıinde qalyp otyr.
Osy aptada AQSH-tyń Mıchıgan shtatynda 1 lıtr benzın quny 12 sentke túsken. AQSH boıynsha benzınniń 1 galonynyń ortasha baǵasy 1 dollar 89 sentti qurap otyr. Bul somaǵa 3,8 lıtr benzın alýǵa bolady degen sóz. Alaıda, AQSH-tyń basqa shtattary men iri qalalarynda benzın baǵasy munsha quldyraǵan joq.
Munaıdyń ústinde otyryp qymbat benzın tutynýymyzdyń basty sebebi munaı óńdeý zaýyttaryna shıkizatty Reseıden alatynymyz, joǵary oktandy benzındi de soltústik kórshimizden tasıtynymyz bolyp otyr. Eldegi benzın baǵasyna eń aldymen Reseı rýbliniń baǵamy yqpal etedi.
GlobalPetrolPrices saıty usynǵan málimetterge sensek, álemdegi 1 lıtr benzınniń ortasha baǵasy 0,97 dollar. Túrli elderdegi baǵalardyń birshama aıyrmashylyǵy baryn joqqa shyǵara almaısyz. Mysaly, benzınniń baǵasy Venesýellada (0,02 dollar), Lıvıada (0,14 dollar), Aljırde (0,20 dollar) eń arzan kúıinde saqtalyp otyr. Eń qymbat benzın Gonkongte (1,81 dollar), Nıderlandta (1,66 dollar) jáne Norvegıada (1,62 dolar) bolyp otyr. Bul kórsetkishterge qarasaq, Qazaqstan benzın baǵasy eń tómen elderdiń qataryna kiredi. Bizden arzan benzın tutynatyn Venesýella, Lıvıa, Aljır, Kýveıt, Saýd Arabıasy, Túrkmenstan, Iran, Katar men Brýneı syndy toǵyz-aq el bar eken.
Ony GlobalPetrolPrices usynǵan tizimnen kóre alasyz:
1. Venesýela $ 0.02 ( 7.6 tg.)
2. Saýd Arabıasy $ 0.23 (87.4 tg.)
3. Túrkmenstan $ 0.27(102.6 tg.)
4. Iran $ 0.32 (121.6 tg.)
5. Qazaqstan $ 0.37 (142 tg.)
6. BAÁ $0.43 (163.4 tg.)
7. Reseı $ 0.49 (186.2 tg.)
8. Qyrǵyzstan $ 0.52 (197.6 tg.)
9. AQSH $ 0.59 (224.2 tg.)
10. Kolýmbıa $ 0.61(231.8 tg.)
11. Belarýs $ 0.62 (235.6 tg.)
12. Aýǵanstan $ 0.64 (243.2 tg.)
13. Týnıs $ 0.77 (292.6 tg.)
14. Avstralıa $ 0.85 (323 tg.)
15. Gondýras $ 0.89 (338.8 tg.)
16. Brazılıa $ 0.90 (342 tg.)
17. Argentına $ 1.01 (383.8 tg.)
18. Ispanıa $ 1.24 (471.2 tg.)
19. Germanıa $ 1.37 (520.6 tg.)
20. Gonkong $ 1.81 (687.8 tg.).
Iaǵnı, janarmaı naryǵynda benzın baǵasy tek munaıǵa qarap túzilmeıtinin, ónimniń ózindik qunymen qosa, túrli salyqtar men tasymal shyǵynana qaraı qalyptasatyny anyq.
Al,munaı óndirgenimen ony óńdeýdi uqsata almaı otyrǵan Qazaqstanda arzan benzın týraly áńgime qozǵaý – qalasaq ta, qalamasaq ta negizsiz talap.
