2016 jyldyń 5 naýryzynda  qoǵam jáne memleket qaıratkeri, Alash arysy Álıhan Bókeıhannyń dúnıege kelgenine  150 jyl tolady. Aıtýly data IýNESKO kóleminde atalyp ótpek.

Mundaı sheshim IýNESKO Bas konferensıasynyń 38-shi sesıasynda maquldanǵan bolatyn. Alaıda, Ult kóseminiń 150 jyldyǵyn qazaq elinde atap ótýge búdjetten kók tıyn bólinbegen, - dep habarlaıdy «Qamshy» portaly «Aqjol» demokratıalyq partıasynyń resmı saıtyna súıene otyryp.

2015 jyldyń qazan aıynda eks-depýtat, «Aqjol» partıasynyń jetekshisi Azat Perýashev májilistiń jalpy otyrysynda premer-mınıstr Kárim Másimovke «Álıhan Bókeıhannyń 150 jyldyǵyn laıyqty deńgeıde ótkizýimiz kerek» degen taqyrypta depýtattyq saýal joldaǵan edi.

Partıa tóraǵasynyń saýalyna Úkimetten mynadaı jaýap kelgen:

– Asa kórnekti qoǵam jáne memleket qaıratkeri Álıhan Bókeıhanovtyń 150 jyldyǵy 2016 jyly respýblıkalyq deńgeıde keńinen atap ótiledi. Qazirgi ýaqytta qarjy-ekonomıkalyq ahýalǵa jáne búdjettiń qysqartylýyna baılanysty 2016 jylǵy mereıtoılyq is-sharalardy ótkizýge arnalǵan maqsatty qarjy qarajaty kózdelmegen. Osyǵan baılanysty, mereıtoılyq is-sharalar memlekettik organdardyń aǵymdaǵy jumysy sheńberinde jáne búdjetten tys qarajatty tartý esebinen ótkiziletin bolady. Álıhan Bókeıhanovtyń 150 jyldyq mereıtoıyn merekeleý jónindegi memlekettik komısıa qurý máselesi boıynsha arnaıy komısıa qurýdyń orynsyz ekenin habarlaımyz. Álıhan Bókeıhanovtyń esimin máńgi este qaldyrý maqsatynda memlekettik organdarǵa tarıhı tulǵanyń mereıtoıy qurmetine BAQ-tarda keńinen jarıalaı otyryp, ǵylymı-tájirıbelik konferensıalar, mádenı-kópshilik jáne basqa da áleýmettik mańyzdy is-sharalar ótkizýge tapsyrma berildi.