Qazaqstanda eldiń nazaryn betaldy taqyryptarǵa burýdyń has sheberi atanǵan Murat Telıbekov jaqynda Májilis depýtattyǵyna ózi laıyqty dep sanaıtyn birneshe tulǵany usynyp, olardyń arasynda belgili reper MS Saılaýbektiń de esimin aıtty. Bul málimdemege narazylyq tanytqan ǵalamtor paıdalanýshylary MS Saılaýbekti de, ony usynǵan Telıbekovti de jerden alyp jerge salýda.

Osy tusta bul usynystyń balama pikir retinde bolsa da «ómir súrýge» haqysy bar ekenin aıta ketken jón. Oǵan negiz de joq emes.

Bárimiz biletindeı, MS Saılaýbek myrza aıtyp júrgen ánderdi bylaıǵy jurt turypty, Sákeńniń ózi de túsinbeıdi. Al, birneshe ret saılanǵan Májilis depýtattarynyń jumysyn da túsingen jan bar ma aramyzda? Jaýap berý qıyn, árıne! Óıtkeni, K. Másimov Úkimeti daıyndap bergen zań jobalaryn súıikti parlamentimiz bir árpin ózgertpeı-aq maquldap keldi. Zeınetaqymen qamtý, shetelden qaryz alý, naryqtaǵy baǵany retteý syndy qanshama ómirlik mańyzy bar zańdyq qujattardy qabyldap jatqan osy parlament emes pe?!

Odan soń, saǵat sanap quldyrap jatqan teńgeniń jaıyn, baspanasyz júrgen qazaqtyń qamyn aıtpasa da, eń quryǵanda «halyq qalaýlylary» retinde depýtat myrzalar qoǵamda bolyp jatqan neshe túrli keleńsiz jaıttarǵa baılanysty pikir bildirip, elge jón silteýge de jaramady. Kóktemde saılanatyn depýtattar korpýsy da burynǵysynan ózgeshe bolady dep aıta almaımyz.

Olaı bolsa, Májiliste «Qazaqstanda qyz-kelinshekter eki kúıeýge tısin» deıtin Baqyt Syzdyqova otyrdy ne, «Jlómana sımanalatqan» Saılaýbek otyrdy ne?! Eger taǵy da aıtqanyn adam túsinbeıtin «ádettegi» parlament jasaqtalatyn bolsa, MS Saılaýbek myrzanyń aty «Nan baǵasyn 300 teńge etý kerek» degen málimdemesinen keıin ǵana elge tanylǵan depýtat Aıqyn Qońyrovtan nesi kem? Endeshe, onsyz da óz-ózin taratýdy surap, artynan sol oryndaryna qaıta jaıǵasatyn «túsiniksiz» depýtattar arasynan túsiniksiz ánshimiz de bir oryn ıelenýge tolyq quqyly. Iaǵnı, Feısbýk áleýmettik jelisinde aıtylyp jatqan «Iá, bizdiń parlament Saılaýbekke saı ǵoı!» deıtin pikirdiń jany bar.