Alash qaıratkeri Álıhan Bókeıhannyń bıyl atalyp ótiletin 150 jyldyq mereıtoıy jóninde Úkimetke qoǵamdyq uıymdar men saıası partıalar tarapynan saýal joldaǵan bolatyn. Kúni keshe osy máseleni kóterip júrgen «aq joldyqtardyń» depýtattyq saýalyna Úkimet basshysy Kárim Másimov jaýap berdi. Jaýap berdi dep óz ózimizdi aldaǵanymyz bolmasa, Úkimet mereıtoıǵa baılanysty eshteńe jasamaıtynyn ashyq aıtyp otyr. Ashshy da bolsa aıtaıyq, Úkimet Álıhan Bókeıhannyń 150 jyldyq mereıtoıyna 1 tıynda bólmeıtinin málimdedi.

Úkimet óz jaýabynda qoǵam jáne memleket qaıratkeri Álıhan Bókeıhannyń 150 jyldyq mereıtoıy 2016 jyly respýblıkalyq deńgeıde keńinen atap ótetinin aıtady. Alaıda, «Qazirgi qarjy-ekonomıkalyq ahýalǵa jáne búdjettiń qysqartylýyna baılanysty 2016 jylǵy mereıtoılyq is-sharalardy ótkizýge arnalǵan maqsatty qarjy qarajaty kózdelmegen» dep jaýap beripti. Úkimettiń aıtýynsha, mereıtoılyq is-sharalar memlekettik organdardyń aǵymdaǵy jumysy sheńberinde jáne búdjetten tys qarajatty tartý esebinen ótkiziletin bolady.

Sondaı-aq, 150 jyldyqty laıyqty atap ótý jónindegi memlekettik komısıa qurý týraly usynysty da Úkimet orynsyz dep otyr. Áıtse de, ult kóseminiń esimin máńgi este qaldyrý maqsatynda memlekettik organdarǵa tarıhı tulǵanyń mereıtoıy qurmetine BAQ-tarda keńinen jarıalaı otyryp, ǵylymı-tájirıbelik konferensıalar, mádenı-kópshilik jáne basqa da áleýmettik mańyzdy is-sharalar ótkizýge tapsyrma berildi.

Bar bolǵany – osy. Al shyn mánisinde, Álıhan Bókeıhannyń 150 jyldyq mereıtoıy dál osylaı atalyp ótilýi kerek pe edi? Óıtkeni, ult kóseminiń qazaq ultyna sińirgen eńbegi ólsheýsiz edi ǵoı. Naqtyraq aıtsaq, ol 1917 jyldyń apaq-sapaq ýaqytynda Alashorda memleketin quryp, qazaq shekarasyn shegendep ketti. Eger alashordashylar 1917 jyly memleket quryp áreket etpegende, biz 1991 jyly táýelsizdik ala almas edik.

Búginde depýtattardan bastap memleket basshysyna deıin «Táýelsizdik eń basty baılyǵymyz» dep aıtyp júr. Al basty baılyqqa jetkizgen alashordashylarǵa degen Úkimettiń qurmeti shamaly bolyp otyr. Onyń ústine, sońǵy jyldary Úkimet «Máńgilik el» bolamyz dep aldyna bıik maqsat qoıyp otyr. Al «Máńgilik el» bolýdyń birden bir joly – Álıhan Bókeıhan bastaǵan Alash arystaryn jas urpaqqa nasıhattaý bolsa kerek. Alaıda, bizdiń Úkimet Alashorda qaıratkerlerinsiz, olardyń mol saıası, ǵylymı muralarynsyz-aq «Máńgilik el» bolǵysy keledi. Shyn mánisinde, Úkimet 1991 jyldan keıingi tarıhpen «Máńgilik el» bolǵysy keletin sıaqty. Eger de Táýelsizdik jyldarynnan keıingi tarıhpen ósip órkendeımiz desek, qatty qatelesemiz. Sebebi, tamyryn tereńge jibere almaǵan báıterekti kez kelgen ýaqytta jel qulatyp kete alady.

Iá, qazirgi tańda elimiz qarjy tapshylyǵyna baılanysty qıyn kezeńdi bastan ótkerip jatyr. Osyny eskerip «Álıhan Bókeıhannyń 150 jyldyǵyn bıyl atap ótpeı-aq qoıalyq» degiń keledi. Alaıda, Úkimet 6 shilde Astana kúnin kól-kósir meıram etip atap ótedi ǵoı. Sonda Alash arysynyń mereıtoıyna tabylmaǵan qarjy «Astana kúnine» qaıdan tabyla ketedi?! Bir qyzyǵy, Úkimet osy mereke úshin qarjy tabady da, Álıhan Bókeıhannyń mereıtoıyna kelgende únemshil bola qalady. Eger de biz shyn mánisinde qarjylyq qıyndyqta otyrsaq, únemshildikke shyndap kóshetin bolsaq, osy Astana kúni syndy merekelerdi jalaýlatyp toılaýdan bas tarta tursaq qaıtedi?

Serik JOLDASBAI

Astana