Áleýmettik jelilerde Qazaqstannyń Eńbek sińirgen qaıratkeri, Táýelsizdik jyldary bar qazaqtyń kózaıymyna aınalǵan «Baýyrjan-shoý» ázil-ospaq teatrynyń negizin qalaǵan óner tarlany Baýyrjan Ibragımov pen áldebir qonaq úı qyzmetshisiniń arasyndaǵy kıkiljiń jazylǵan vıdeo keń taralyp, qyzý talqyǵa túsýde. Ádettegideı, jeli qoldanýshylarynyń basym bóligi azamatty synǵa alýda. Tipti, oıda-joqta paıda bolǵan vıdeony jerden jeti qoıan tapqandaı qýana qabyldaǵandar da bar sıaqty.
Áriden oılasaq, vıdeoda jazylǵan jaǵdaılar kez-kelgen adamnyń ómirinde bolyp jatady. Mundaı, Baýyrjannyń bar aıyby – Qudaıbergen Bekish aıtqandaı, «proklátaıa popýlárnost, ıaǵnı, tanymaldyǵy. Alaıda, onyń tanymaldyǵy eshkimge onyń jeke qupıalaryn ashýǵa, jer jahanǵa taratýǵa, kóp bolyp talqylaýǵa quqyq bermeıdi.
Ekinshiden, ol vıdeo bolǵan jaıdyń jaı-japsaryn tolyq túsinýge múmkindik bermeıdi. Shynymen de, elge tanymal azamat ashýlanatyndaı, daýys kóterip, yzalanatyndaı jaǵdaı bolǵan shyǵar. Elimizdegi qaı salada bolmasyn, qyzmet kórsetý sapasynyń qandaı deńgeıde ekeni bárimizge aıan ǵoı. Alys joldan sharshap kelgen Baýkeń shynymen de orynsyz kedergilerge tap bolyp ashynýy da múmkin ǵoı.
Úshinshiden, sol vıdeony túsirgenderdiń áreketin de zań talaptaryna, adamgershilik normalaryna saı dep aıta almaımyz. Vıdeonyń jasyryn, Baýyrjan Ibragımovke eskertilmeı túsirilgeni anyq kórinip tur. Túsirip qana qoımaı, jeke basqa qatysty qupıany ǵalamtorǵa jarıalaýdyń zań aldynda da, ar aldynda da qandaı jaýapkershilik júkteıtinin aıtpaı-aq qoıaıyq.
«Joq jerden akterge advokat tabyla ketipti» dep sókpeńizder. Baýyrjandaı azamattyń abyroıy bizdiń bir aýyz sózimizge qarap qalǵan joq. Tipti, myna jaǵdaı da onyń bedeline nuqsan keltiredi dep oılamaımyz. Ol jerden alyp, jerge salarlyqtaı qolynda bıligi bar, el taǵdyryna jaýapty laýazymdy tulǵa emes. Áıtpese, prokýrorlardyń araq ishkenin, polıseılerdiń jezókshelermen ámpeı-jámpeıligin áshkereleıtin de vıdeolardy kórip júrmiz. Joǵary bılik basyndaǵylardyń da san pendeshiligin bilemiz. Aıtpaǵymyz, azamattyǵymyzdy joǵaltpaıyq. Arzan kúlki, jeńil áńgimege erip, atpal azamattyń jeke ómirine qol suqpaıyq, elge masqara bolmaıyq.
Jomart Abdollauly
