QR Investısıalar jáne damý mınıstrliginde Almaty oblysynda tikushaq qulaýynyń sebepterin tekserý jóninde komısıa quryldy, - dep habarlaıdy «Qamshy» portaly vedomstvonyń baspasóz qyzmetine silteme jasap.

Eske sala keteıik, Úsharal - Taldyqorǵan baǵyty boıynsha reıs atqarǵan áýe kemesi keshe 27 qańtarda apatqa ushyrady. Tikushaq bortynda 5 adam: ushqysh V.Kondratúk, 1970 j.t.; dáriger gematolog B.Qaısanova, 1964 j.t., feldsher G.Hamıtova, 1993 j.t., K.Ábilqasym - 1989 j.t., B.Ábilqasym - 2015 j.t. boldy. Qaza bolǵandardyń deneleri jáne tikushaq synyqtary Taldyqorǵan qalasy áýejaıynan 18 shaqyrym jerden tabyldy.

2016 jylǵy 27 qańtardaǵy saǵat 18:30-da (Astana ýaqytymen) alynǵan alǵashqy habarlamaǵa sáıkes «Qazaeronavıgasıa» RMK jedelhatynda atalǵan bort ekıpajy 18 shaqyrym qashyqtyqta 500 metrge deıin bıiktikti tómendetý týraly baıandaǵannan keıin qonatyn jerine kelip jetpegeni aıtylǵan.

QR Investısıalar jáne damý mınıstrligi kólik prokýratýrasymen birlese otyryp, sanıtarlyq avıasıanyń barlyq áýe kemelerin túgelimen tekserýdi bastaıdy.

Qaıǵyly oqıǵaǵa baılanysty QR Densaýlyq saqtaý jáne áleýmettik damý mınıstri Tamara Dúısenova qaza bolǵandardyń otbasyna kóńil aıtty.