Búgin Aqtóbede alǵash ret baýyr almastyryldy. Sırroz dertine shaldyqqan 38 jastaǵy aqtóbelik áıelge týǵan inisi donor bolýǵa kelisimin bergen, - dep habarlaıdy "Qamshy" portaly Kerek-ınfoǵa silteme jasap. 
Kúrdeli ota jeti saǵatqa sozyldy. Ony ońtústik koreıalyq hırýrgtar aqtóbelik dárigerlermen birlesip jasady. Mundaı operasıa Aqtóbede buryn sońdy jasalǵan emes. Sondyqtan otaǵa medısına ǵylymdarynyń doktory, profesor Jaqsylyq Dosqalıev te qatysqan. 
- Pasıent birneshe jyldan beri baýyr sırrozymen aýyrady. Eger ýaqytyly ota jasalmasa, arty ólimmen aıaqtalýy da múmkin edi.Ápkesine baýyrynyń jartysyn berýge 26 jastaǵy inisi kelisken bolatyn. Odan alynǵan ishki aǵza 1 jyldyń shamasynda qaıtadan qalpyna keledi, -deıdi Aqtóbe oblystyq densaýlyq saqtaý basqarmasynyń basshysy Áset Qalıev.
Búginde Aqtóbe oblysynda 60 adam baýyryn almastyrý úshin kezekte tur. Budan ózge 128 emdelýshiniń búıregine transplantasıa jasalýy kerek. Alaıda, naýqasqa sáıkes keletin donor tabý qıyn. Sol sebepti aqtóbelik dárigerler jaqyn arada máıit donorlyǵyn qolǵa almaq. 
Aqtóbelik dárigerler bıyldan bastap sheteldik mamandardyń qatysýynsyz baýyrǵa trasplatasıa jasaýdy josparlap otyr. Ota respýblıkalyq búdjet esebinen tegin jasalady.