Keshe Mańǵystaý – Almaty baǵytynda qatynaıtyn jolaýshylar poıyzy «Mańǵyshlaq-Beıneý» ýchaskesinde «Admgaz» JSHS-ǵa tıesili gaz tasýshy júk kóligimen soqtyǵysyp, gaz tasýshy kólik júrgizýshisi qaza tapty, - dep habarlaıdy «Qamshy» portaly.

Mańǵystaý oblysy ákiminiń orynbasary Ánýar Shójeǵulovtyń aıtýynsha, apat saldaryn joıýǵa tótenshe jaǵdaılar qyzmeti men «Qazaqstan temirjoly» AQ-nyń mamandary der kezinde aralasyp, poıyz jolaýshylaryn qaýipsiz aımaqqa alyp shyqqan.

«Atap aıtqanda, apattan soń poıyz quramy dereý qosymsha teplovozben qaýipsiz qashyqtyqqa aparyldy. TJD-nyń 50-den astam qyzmetkeri, apat ornyna jaqyn ornalasqan eldi mekenderdiń órt sóndirý bólimderiniń qyzmetkeri 40 tonnalyq gaz tasýshy kólik sısternasyn salqyndatý jumystaryn júrgizdi. Bul jumystarǵa arnaýly tehnıkalar, onyń ishinde, qalpyna keltirýshi poıyz, bes órt sóndirýshi tehnıka jumyldyryldy», - delingen ákimdik taratqan baspasóz habarlamasynda.

«Jolaýshylar qaýipsiz qashyqtyqta, olar ystyq tamaqpen, jyly kıim-keshekpen qamtamasyz etildi. Soqtyǵysý kezinde poıyzdyń joldan shyǵyp ketýi oryn alǵan joq, temirjolǵa nuqsan kelmedi. Jaǵdaı tolyqtaı baqylaýda. Mańǵystaý oblystyq TJD málimetterine saı, ekologıaǵa esh qaýip tónip turǵan joq», - deıdi oblys ákiminiń orynbasary Ánýar Shójeǵulov.

Sondaı-aq, oblysta osy oqıǵanyń mán-jaıyn anyqtaý maqsatynda Á. Shójeǵulov basshylyq etetin jedel shtab qurylǵan.