"Nur Otan" partıasy atynan Májilis depýtattyǵyna 127 úmitker tirkeledi, - dep habarlaıdy "Qamshy" portaly partıanyń baspasóz qyzmetine silteme jasap.

"QR Parlamenti Májilisiniń depýtattyǵyna úmitkerlerdiń partıalyq tizimine 127 adam enip otyr. Olardyń qatarynda respýblıkaǵa belgili saıasatkerler, qoǵam qaıratkerleri, sportshylar men óner ıeleri bar", - delingen partıanyń kezekten tys 17-shi sezi barysynda taratylǵan aqparatta. 

Aıta keteıik, alqaly jıynǵa 2 myńnan asa delegat qatysýda. Olardyń qatarynda respýblıkanyń barlyq óńirlerindegi konferensıalarda saılanǵan delegattar, memlekettik basqarý organdarynyń, ulttyq holdıńterdiń, bilim, ǵylym, mádenıet jáne sport qaıratkerleri, qoǵam, dıplomatıalyq korpýs, úkimettik emes jáne jastar uıymdarynyń, buqaralyq aqparat quraldarynyń, bastaýysh partıa uıymdarynyń ókilderi bar.

Sıeze «Nur Otan» partıasynyń jańa saılaýaldy baǵdarlamasy qabyldanatyn bolady. Sondaı-aq  QR Parlamenti Májilisi depýtattaryn saılaýǵa qatysty partıalyq tizim bekitilmek. Baǵdarlama jobasy aldaǵy besjyldyq kezeń boıynsha 2021 jylǵa deıingi partıanyń negizgi baǵytyn aıqyndaıdy. Ol boıynsha «100 naqty qadam» Ult josparyn júzege asyrý sharalary qamtamasyz etiledi. Budan bólek, partıa baǵdarlamasynda «Qazaqstan 2050» Strategıasy, «Nurly jol» baǵdarlamalaryn júzege asyrýdyń naqty tetikteri de qarastyrylady.