Almatylyqtar Alataýdaǵy Fýrmanov shyńyna Álıhan Bókeıhanulynyń atyn berýdi usyndy. Alataýdyń bıiktigi 3000 metr bolatyn shyńyn baǵyndyrǵan «Sapaly qazaq» qoǵamynyń 100-ge jýyq múshesi shyń basynda turyp vıdeousynys tastady. 
Salaýatty ómir salty men erik-jigerdi shyńdaýǵa baǵyttalǵan shara Alash kósemi Álıhan Bókeıhanulynyń 150 jyldyń mereıtoıyna arnaldy, - dep habarlaıdy "Qamshy" portaly.
«Bıyl Álıhan Bókeıhanov babamyzdyń týǵanyna 150 jyl tolyp otyr. Ol kisiniń qazaq eline sińirgen eńbegi orasan. Sondyqtan Alataýdyń bir shyńyn Álıhan Bókeıhanulynyń atymen atasaq degen usynys tastaımyz. Tómende bul shyńǵa jete almaı qalǵan 100-ge jýyq adam bar. Áleýmettik jelide bul usynysty qoldaǵan Qazaqstannyń túkpir-túkpirindegi 5000 adam bar. Barlyǵymyzdyń tilegimiz bir. Qazaqtyń ulylary qazaq Alataýynyń shyńdarynyń ataýyna ábden laıyq dep sanaımyz», - dedi «Sapaly qazaq» qoǵamynyń negizin qalaýshy, bıznesmen, alǵashqy qazaq tilindegi «Bıznes bastaý» mektebiniń jetekshisi Ahmetbek Nursıla. 
Belsendiler endi atalǵan usynysty onomastıkalyq komıtetke tapsyrmaqshy. 
Aıta ketý kerek, atalǵan qoǵam músheleri úshin ár aptanyń jeksenbisinde Medeý shatqalynda jınalyp, taýǵa shyǵý dástúrge aınalǵan. Aıyna bir ret qatysýshylar arasynda eń birinshi bolyp shyńǵa shyqqan adamǵa arnaıy syılyqtar taratylady. 
Olardyń bastamasy Feısbýk qoldanýshylarynyń arasynda úlken qyzyǵýshylyq týǵyzyp jatyr. Qazirdiń ózinde Qazaqstannyń túkpir-túkpirinen kelip qatarǵa qosylyp jatqandar kóp.