RF prezıdenti Vladımır Pýtınniń úlken qyzy da sińilisi sıaqty ákesiniń tegin qoldanbaıdy. Qazir Máskeýde turatyn ol 2011 jyly Máskeý memlekettik ýnıversıtetiniń fýndamentaldi medısına fakúltetin qyzyl dıplommen támamdaǵan, - dep habarlaıdy «Qamshy» portaly The New Times júrgizgen zertteýlerge silteme jasap.
Basylymnyń jazýynsha medısına mamany bolǵanymen aty-jónin Marıa Voronseova dep jazdyrǵan ol qarapaıym adamdarǵa uqsamaıtyn ómir saltyn ustanatyn kórinedi. Onyń Eýropaǵa jıi saıahattap turatynyn jazady The New Times.
Golandıalyq kásipkerge turmysqa shyqqan ol keıin aty-jónin Marıa Faasen dep ózgertken. Alaıda, jýrnaldyń derekkózderi Marıa buǵan deıin de tórt túrli famılıa ıelengenin aıtady.
Jýrnal Marıa Faasonnyń turatyn úıi Máskeýdegi Novınskıı býlvarynda, AQSH elshiligimen irgeles ekenin aıtady. Basylym sondaı-aq, ol arnaıy «megalka» ornatylǵan kólikpen júretinin, telefonmen fransýz tilinde sóılesetinin jáne ózin Marıa Vladımırovna dep tanystyratynyn da jazady.
Basylym betinde Pýtınniń qyzynyń kýrstastary ǵalamtorǵa jarıalaǵan sýretter de jarıalanǵan. 2008-2013 jyldary túsirilgen ol sýretterde Italıa, Fransıa men Ispanıaǵa saıahattar túsirilgen. Basylym prezıdenttiń qyzy qurbylarymen birge táýligine jaldaý aqysy 35-45 myń EÝRO bolatyn Aria kemesimen seıil qurǵanyn jazady. Sondaı-aq, onyń Eýropanyń basqa da elderine sapar shekken sýretterin jarıalaıdy.
Basylym zertteýinde sonymen qatar, Marıa Voronseova-Faasenniń bir qyzy bary jáne kandıdattyq dısertasıa qorǵaǵandyǵy aıtylady. Tipti, Germanıada «Idıopatıalyq ergejeılilik» taqyrybynda monografıa jarıalaǵanyn, 2014 jyly ótken halyqaralyq ǵylymı konferensıalardyń birine «Germanıanyń balalarǵa endokrınologıalyq kómek kórsetý tájirıbesi» taqyrybynda ǵylymı jumys usynǵany aıtylady.
Alaıda, sheteldik basylym Reseı basshysynyń qyzdary týraly bılik oryndarynan eshqandaı resmı málimet ala almaǵan. V. Pýtınniń otbasy týraly resmı málimetterde onyń tek qana 1985, 1986 jyldary týǵan Marıa jáne Katerına esimdi eki qyzy bary ǵana aıtylady. Biraq, reseılik aqparat quraldary buǵan deıin RF prezıdentiniń kishi qyzy týraly málimetterdi taýyp jarıalaǵan bolatyn. Qujat boıynsha Ekaterına Tıhonova atalatyn ol reseılik «Innopraktıka» kompanıasyn basqarady jáne Máskeý memlekettik ýnıversıtetin damytý jobasyna qatysatynyn jazǵan edi.
