Shymkentte İİM ortalyq apparatynyń qyzmetkerleri ustaǵan belgili kásipker Toqtar Tóleshov qarjylyq múmkindikteriniń moldyǵymen erekshelenedi. Ol biraz ýaqyt buryn qalada dúrkiretip turyp saýyq keshterin uıymdastyrǵan. Onyń qarjy resýrstary shymkenttikterge árqashan qatty áser etken, - dep habarlaıdy «Qamshy» portaly KTK telearnasyna silteme jasap.
"Tóleshovtiń týǵan kúnine Qazaqstannan ǵana emes, shet elderden de saıası jáne juldyzdy tulǵalar keletin bolǵan. Toqtar óziniń 13 balasyna da merekeni dúrkiretip ótkizgen. Kásipkerdiń árbir balasy qalaǵan pop-juldyzyn shaqyrtyp otyrǵan (kadrlarda Dmıtrıı Nagıev, Tımatı jáne Ivan Dorn kórsetildi - Avt). Ákesine, ózine de, úlken ulyna da úlkenderge arnalǵan oıynshyqtar - áskerı ushaqtar, tehnıkalar. Ol "Shymkent pıkchers" kınostýdıasyn ashyp, Gollıvýd maıtalmandarymen birge fılm túsirdi. Toqtar Tóleshovtiń bas suqpaǵan salasy kemde-kem. Ol Qazaqstandy qoıyp, Reseı jýrnalıseri qaýymdastyǵynyń múshesi atanǵan. Dinniń de janashyry-mys. Al, qolyna kisen salynǵan boıda kásipker birden Astanadaǵy abaqtyǵa jetkizilgen. Ony qazir İshki ister mınıstrliginiń qyzmetkerleri tergep jatyr", - dep habarlanǵan telearna sújetinde.
Bıznesmenniń kórshileri bolsa onymen birge turýdyń jaıly bolǵanyn aıtady. Sóıtsek ol óz úıiniń mańynda ǵana saýyq qurmapty. "Kórshi retinde jaqsy adam, eshkimge tıispeıdi, jaryqty qosty, kóshege asfált tósedi", - deıdi kórshileriniń biri.
Telearna tilshileriniń málimetinshe, bıznesmendi Tarazdyń turǵyny ǵana ashyq qorǵap shyǵypty. Er adam sol úshin Shymkentke kelipti. Ádilbek Moldataev Tóleshovtiń dástúrli emes ıslamǵa eshqandaı da qatysynyń joqtyǵyn aıtady. Sondyqtan odan tabylǵan kúdikti oqýlyq máselesinde birneshe suraq týyndaıdy.
"Olar saqal ósiredi, sholaq shalbar kıedi, galstýk taqpaıdy. Toqtar Tóleshov galstýk taǵady, kostúmmen júredi", - deıdi Moldataev. (Derekkóz: KTK).
Al, TVK telearnasy Shymkenttegi arnaıy operasıaǵa qatysty jańa vıdeony jarıa etti. Oǵan qarǵanda, kadrlardan birneshe fıgýrant kórinedi. Kadrlarda: jerde jatqan adamdar, olardy kúzetip turǵan arnaıy jasaq jaýyngerleri. Oqıǵa bıznesmenniń úıiniń mańynda bolǵanǵa uqsaıdy.
Eske salaıyq, osyǵan deıin Shymkentte arnaıy operasıa kezinde belgili kásipker Toqtar Tóleshovtiń ustalǵany habarlanǵan bolatyn. Turǵylyqty meken-jaıy men jumys ornyn teksergen kezde qarý, esirtki zaty jáne oqýlyq tabylyp, tárkilengen.
Ustalǵan kásipker "Shymkentsyra" JSHS ıesi jáne Terrorlyq qaterlerdi saraptaý ortalyǵyn basqarǵan. Birlestiktiń saıtyndaǵy ómirbaıanda Tóleshovtiń 2008 jyldan bastap qoǵamdyq uıymdarda kóptegen qyzmetterdi atqarǵany jazylǵan. Sonymen birge, ol - "Nur Otan" partıasynyń múshesi, birneshe jýrnalıser odaǵynyń múshesi jáne Qazaqstan kazaktary birlestiginiń joǵarǵy atamanynyń keńesshisi.
Bir aıtarlyǵy, Shymkenttegi arnaıy operasıaǵa ońtústikqazaqstandyq polıseıler tartylmaǵan. Bul operasıa elordanyń arnaıy qyzmetteri baqylap, tergep otyr.
