Ál-Farabı atyndaǵy Qazaq Ulttyq ýnıversıtetiniń qyzmetkeri, fotograf Marat Keńesuly Birikken ulttar uıymynyń Bas hatshysy Pan Gı Mýnnyń ystyq yqylasyna bólendi, - dep habarlaıdy «Qamshy» portaly ýnıversıtettiń baspasóz qyzmetine silteme jasap.
Fotograf Marat Keńesuly kásibı fotojýrnalıstıkaǵa 1991 jyldan bastap kiriskenin aıtady. «Zenıtten» bastap sandyq fotoaparattyń san túrimen jumys jasaıdy. Onyń fotoreportajdaǵy dúnıeleri oblystyq, respýblıkalyq basylym betterinde jıi jaryq kórip turǵan. Fotograftyń eń sátti túsirilgen reportajdarynyń biri – ótken jyly Astana qalasynda oryn alǵan QazUÝ rektory Ǵ.Mutanovtyń BUU Bas hatshysy Pan Gı Mýnǵa QazUÝ-dyń qurmetti profesory dárejesin usynǵan sáti edi. Marat Keńesuly dál osy reportajdy túsirýge joldama alǵan kúnnen bastap, bir aı ózin-ózi daıyndap, jetildirgen. Nátıjesinde, barlyq sýretteri kompozısıalyq jaǵynan óte sátti ári durys júzege asty. Mine, sol eńbegi úlken marapatqa ıe boldy. Qazaqstan Respýblıkasy Syrtqy ister mınıstrliginiń atynan 2015 jyly birlesip jasaǵan eńbegi úshin QR SİM Almaty qalasy ókildiginiń basshysy Arslan Dandybaevtan arnaıy alǵys hat alady. Alǵys hatta Marat Keńesulyna mınıstrlik tarapynan úlken rızashylyq bildirgen jáne tolaǵaı tabys tilegen.
Sondaı-aq Marat Keńesuly BUU Bas hatshysyn túsirgen fotosýretterin úlken fotoalbom etip, jaryqqa shyǵarady. AQSH-qa BUU keńesine arnaıy shaqyrylǵan ýnıversıtetimizdiń Birinshi prorektory M. Búrkitbaev myrza onyń jasaǵan syıyn Bas keńsede arnaıy tabystaıdy. Bul syılyqty erekshe qýanyshpen qabyl alǵan Pan Gı Mýn myrza: «Bul men úshin Qazaqstan saparynan úlken estelik boldy», – dep ystyq yqylasyn bildiripti.
Qarapaıym ǵana aýyl topyraǵynda dúnıege kelgen Maratqa ǵana emes, bútin aýyl úshin ol kezde fotografıa tańsyq edi. Onyń bul salaǵa kelýi de tosynnan bastalǵan.
Altynshy synypta oqıtyn Marat Keńesuly synybymen birge aýylǵa aıyna bir ret aýdan ortalyǵynan at basyn buratyn fotografqa sýretke túsedi. Arada eki-úsh apta ótkennen keıin fotograftyń sýreti daıyn bolady. Jantalasa júgirgen oqýshylar japatarmaǵaı talasyp sýretterin alysady. Marat ta solardyń qatarynda edi. Biraq, ishindegi eń nashar sýret te Marat Keńesulynyń keskini edi. Ózinen-ózi qatty uıalǵannan ol balalyqpen sýretti kópshilikke kórsetpeı, úıine tyǵyp qoıady, tastaıyn dese, baǵaly dúnıe ekenin sezedi.
Ár kún saıyn sýretke degen nazyn bildirip, kúbirlep júrgen shaqtary áli esinde. Osy kemshilikterdiń ornyn tolyqtyryp, saýatty sýretke túsirý maqsatynda ákesiniń qarjysymen 1976 jyly alǵash ret fotoaparat satyp alady. Tilin túsine bermeıtin mektep oqýshysy ózinen ozyq, tehnıkaǵa úıir dostarynan bul ǵajaıyptyń syryn uǵynady. Eń bastysy, ózine unaıtyn kadr túsirý endigi onyń negizgi maqsatyna aınalady. Balalyq armanmen fotografıaǵa osylaı tosynnan kelgen aǵamyz bertin kele shynaıy fotografıa álemine qadam basyp, san salaly taqyrypqa fotoreportaj jasaýmen aınalysty.
Áskerge shaqyrylyp, Otan aldyndaǵy abyroıly boryshyn da ol sátti oryndap shyǵady. Taǵdyrdyń buıryǵy ma, ásker salasynda júrip te osy salamen shuǵyldanady. Óte ozyq áskerı fotoobektıvpen jabdyqtalǵan barlaý qurylǵysy túsiriliminiń tizginin ustaǵan Marat Keńesuly san túrli jaýapty mindetterdi tıanaqty atqarady. Ár túsirgen kadry asa qundy boldy. Alystaǵy jaýdyń ushaǵynan bastap, kemesine deıin ozyq quralmen sýretke túsirip, tıisti atqarýshy bılikke jetkizip otyrǵan ol «áserdiń fotoqyrany» atandy.
Dosjan BALABEKULY
