Máskeýde Ortalyq Azıadan barǵan 12 mıgrant tigin fabrıkasynda bolǵan órtte tirideı janyp ketti, - dep habarlaıdy «Qamshy» portaly PHOENIX news-ke silteme jasap.

Qaıǵyly oqıǵa ótken senbiden jeksenbige qaraǵan túni, Máskeý ýaqytymen túngi ondar shamasynda bolǵan. Reseı astanasynyń Stromynka aýdanyndaǵy fabrıkada bolǵan órt kezinde Qyrǵyzstan men Ózbekstannan barǵan 12 adam tirideı janyp ketken. Qaza tapqandardyń ishinde 3 jas bala bar deıdi basylym.

Basylymnyń habarlaýynsha, qaza tapqandar zańsyz jolmen elde jumys istep júrgen mıgranttar otbasy kórinedi. Qaıǵyly oqıǵa týraly habar R. Qadyrovtyń ınstagramdaǵy sýretterin talqylaǵan reseılik eshbir resmı aqparat quraldarynda der kezinde kórinis tappaǵan. Oqıǵa týraly vıdeony birneshe kún ótken soń eń alǵash bolyp Ortalyq azıalyq televızıa (CATV) saıty jarıalap otyr.