Bul týraly Mańǵystaý oblysynyń ákimi Alık Aıdarbaev a QR Prezıdenti janyndaǵy Ortalyq komýnıkasıalar qyzmetiniń brıfıńi barysynda baıan etti. Onyń aıtýynsha, Mańǵystaý oblysynyń ákimdigi óńirge tán damý baǵyttaryn, ıaǵnı, munaı-gaz óndirýdi, munaıservısti, kólik jáne logıstıkany, qurylys jáne týrızmdi naryq talaptaryna sáıkes baqylap otyrady, - dep habarlaıdy «Qamshy» portaly.
«Qazirgi tańda, munaı-gaz óndirýshi jáne munaı servıstik kásiporyndar eńbek ónimdiligi men óndiris tıimdiligin arttyrýǵa baǵyt alǵan. Negizgi kapıtalǵa salatyn ınvestısıa kólemi 454 mlrd. teńgeni qurady. Kásiporyndar shtattyq tártipke sáıkes jumys jasaıdy. Ótken jyly óndiris úderisi turaqtylyǵyn saqtaý máseleleri boıynsha yntymaqtastyq týraly jasalǵan 620 Memorandýmnyń nátıjesinde, ekonomıkanyń ár túrli sektorynda jumys jasaıtyn 105 myń qyzmetshiniń múddeleri qorǵaldy. 2016 jyldyń alǵashqy aıynyń ózinde óńirdegi iri munaıgazóndirýshi kásiporyndarmen úshjaqty 16 Memorandým jasaldy. Bul baǵyttaǵy jumystar jalǵasyn tabady», - deıdi Mańǵystaý oblysynyń ákimi Alık Aıdarbaev.
2015 jyldyń qorytyndysy boıynsha eńbek naryǵyndaǵy kórsetkishter jaqsardy. Mysaly, Mańǵystaý oblysyndaǵy ekonomıkalyq belsendi halyqtyń sany 7%-ǵa artyp, 283,4 myń adamnan 302,4 myń adamǵa deıin ósti. Ekonomıka salasynda qyzmet etýshiler sany 286,9 myń adamdy qurady. Oblystaǵy ózin-ózi jumyspen qamtýshylar sany 19,7 myńnan 15,2 myń adamǵa deıin azaıyp, jumyspen qamtylǵandardyń jalpy sanyndaǵy olardyń úlesi 5%-dy ǵana qurady. Bul elimizdiń aımaqtary arasyndaǵy eń tómengi kórsetkish.
- «Jumyspen qamtý jol kartasy – 2020», memlekettik jáne salalyq baǵdarlamalardyń, óńirlerdi damytý baǵdarlamalarynyń tıimdiligin, ashyq naryqtaǵy jumyssyzdar sanynyń 5,3%-dan 5,1%-ǵa, sonymen qatar jastar arasyndaǵy jumyssyzdar sanynyń 7,4%-dan 4,7%-ǵa tómendeýinen kórýge bolady. Osylaısha,2015 jyly 27 myńnan joǵary adam jumysqa ornalasty, - dep atap ótti Alık Aıdarbaev.
Mańǵystaý oblysyndaǵy ekonomıkanyń damý qarqynyn saqtaýǵa, quny 159 mlrd. teńgeni quraıtyn «Nurly jol» memlekettik baǵdarlamasy aıasynda iske asyrylǵan 14 joba yqpal etti. Aıta keteıik, memlekettik baǵdarlama aıasynda jańadan 4 myń jumys oryndary ashylady. 2015 jyly ındýstrıalandyrý Kartasy aıasynda jalpy quny 50,5 mlrd.teńgeni quraıtyn 11 ındýstrıaldy jáne ınfraqurylymdy joba, sonyń ishinde, «Azersýn» óndiristik-logıstıkalyq ortalyǵy, «Sofı Medgrýpp» kópsalaly medısınalyq klınıkasy jáne Aqtaý teńiz soltústik termınaly iske qosyldy.
