Esterińizde bolsa, buǵan deıin Eýrazıalyq ıntegrasıa ınstıtýty el arasynda saýalnama ótkizip, kezekten tys Májilis saılaýyna qatysty halyqtyń pikirin suraǵan edi. Instıtýt ótkizgen saýalnama nátıjesi oǵan qatysqandardyń 93,6 paıyzy merziminen buryn ótkeli jatqan saılaýdy qoldaıtynyn kórsetken edi.
Jaqynda «NewTimes.kz» agenttigi de osy taqylettes saýalnama júrgizgenin jarıalady. Bul saýalnama aldyńǵysyna kereǵar nátıje kórsetken. Árıne, saýalnama nátıjesiniń qalyptasýyna oǵan qatysýshylarǵa qoıylǵan suraqtardyń da ózgesheligi áser etken.
Atap aıtar bolsaq, «NewTimes.kz» agenttigi júrgizgen ol saýalnamaǵa qatysqandardyń tek 5,6 paıyzy ǵana aldaǵy saılaýdy qoldap daýys bergen. 41,7 paıyz respondent saılaýǵa asa mán bermeıtinin bildirgen. Al, qatysýshylardyń 36,9 paıyzy aldaǵy saılaýdy «Búdjet qarjysyn bekerge shashý» dep sanaıdy eken.
Agenttik saýalanama nátıjelerin jarıalaı otyryp, Eýrazıalyq ıntegrasıa ınstıtýty (EII) júrgizgen suraýdyń nátıjelerine de toqtalady. Osy máselege oraı tanymal saıasattanýshy Tolǵanaı Úmbetálıevanyń da pikirin biledi.
«Munda bılikke jaqyn zertteý ınstıtýttary ótkizgen saýalnamaǵa taǵy bir soǵyp ketý kerek. Ondaǵy qoıylǵan suraqtar men berilgen jaýaptar parlamentke, onyń ishinede Májiliske degen halyqtyń kózqarasyn bilýge múmkindik berýi tıis. Saıası júıe eger tek bıliktegi birinshi tulǵa Prezıdentke ǵana emes, parlament, úkimet, partıalar men sot organdary, BAQ sıaqty ınstıtýttarǵa halyq senimi joǵary bolǵanda ǵana turaqty dep sanalady. EII-diń saýalnamasyna saı, respondentterdiń 96,3 paıyzy merziminen buryn saılaý ótkizgendi qoldaǵan. Bul, ıaǵnı, halyqtyń 90 paıyzynan astamy keshe taratylǵan parlamentke, ondaǵy basym orynǵa ıe «Nur Otan» partıasyna senbeıdi degendi bildiredi. Demek, halyqtyń basym bóligi «Nur otanǵa» senimziszdik tanytyp otyr. Sondyqtan, aldaǵy saılaýdyń merziminen erterek ótkenin qalaǵan», - deıdi saıasattanýshy Tolǵanaı Úmbetálıeva.
Shynymen de, qaı saýalnamanyń nátıjesine qarasańyz da búgingi bılik úshin paıdaly tusyn tappaısyz. Merziminen buryn saılaý ótkenin qoldaıtyndar kúni keshe óz-ózderin taratqan depýtattardyń, depýtattyq korpýstyń 80,99 paıyzyn quraǵan «Nur Otan» fraksıasynyń dármensizdigin bilip daýys bergen. Al, kezekten tys saılaý ótýin qoldamaıtyndardyń kókeıindegi kúdik te belgili. Kópshilik bul saılaýdyń da ádil ótpeıtinin, qazaqstandyq parlamentarızmdi halyqaralyq talaptarǵa saı damytýǵa sep bolmaıtynyn bilgendikten, qıyn-qystaý zamanda qazyna qarajatyn jelge ushyrmaýdy qalaıdy. Qysqa qaıyrar bolsaq, eýrazıashyldar men táýelsiz basylym ótkizgen eki saýalnamanyń nátıjesi de «Japalaqty tasqa ursań da japalaq óledi, japalaqty taspen ursań da japalaq óledi» degen mysaldy eske túsirip otyr. Iaǵnı, aldaǵy kezekten tys saıası doda tek halyq pen opozısıalyq kúshter úshin ǵana emes, memlekettik basqarý júıesiniń barlyq tarmaǵyn ýysynda ustaǵan bas partıa úshin de tıimsiz bolyp otyr.
Jomart Abdollauly
