Aqtóbe oblysynyń ákimi Berdibek Saparbaev oblystaǵy 800-ge jýyq turǵany bar Qaıyńdy aýylyna 10 jyldan beri jaryq tartpaǵan Muǵaljar aýdanynyń ákimi men orynbasarynyń úıine baratyn elektr toǵyn qıýdy tapsyrdy, - dep habarlaıdy «Qamshy» portaly NUR.KZ-ke silteme jasap.

Endi aýdan ákimi Serik Shańǵutov Qaıyńdynyń qıyndyǵyn sheshkende ǵana úıinde jaryq jaǵa alady. Muǵaljar aýdanynyń ákimi Serik Shańǵutov buıryqty maquldaǵannan basqa túk deı alǵan joq. Aýdanǵa qaraıtyn Qaıyńdy aýylynyń turǵyndary XXI ǵasyrda qarańǵylyqta ómir súrip jatyr.

«Energosıstema» 35 shaqyrym jelini menshikke berse, jaryqpen qamtamasyz etem dep otyr. Sony sheshe  almaısyńdar ma? 10 jyldan beri aýyl jaryqsyz otyr. Sizdiń úıde jaryq bar. Basqaǵa bas aýyrtyp otyrǵan joqsyńdar. Osy jerde jaryqqa jaýapty adam bar ma? Búginnen bastap aýdan ákimi men  orynbasarynyń úıindegi jaryqty sóndirińiz. Qashan Qaıyńdydaǵy jaryqty sheshedi, sol kezde qosyńyz»,- degen oblys ákimi aýdan basshysymen ótkizgen jıynda.

Muǵaljarda 4300 adam jer kezeginde tur. Aqtóbe oblysyndaǵy jumyssyzdar sany qysqarmaı otyrǵan aýdan osy Shańǵutovtyń eli. Shashaýy shyqqan sharýa shash etekten. Aýdanda jumys jasap turǵan shaǵyn kásiporyndar sany azaıǵan, jumysshylary qysqarǵan, salyq tómendegen.

«Men negizinen gaz, sý, jylýǵa kóńil bólip, jol sál kesheýildep qaldy. Qandyaǵashta 32 kóshe bar.  Onyń 11-ne asfált tóseldi» ,- dedi Shańǵutov.

«11 jyl ákim bolyp, 11 kóshege jol tósepsiń. Ár jylǵa bir jol. Qalǵan kósheni jóndeýiń úshin saǵan 30 jyl kerek pe?», — degen Saparbaev saýalynan Shańǵutov únsiz qutylǵan.