Memleket basshysy «Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń jalpyáskerı jarǵylaryn bekitý týraly» Qazaqstan Respýblıkasy Prezıdentiniń 2007 jylǵy 5 shildedegi № 364 Jarlyǵyna ózgerister engizý týraly» Jarlyqqa qol qoıdy, - dep habarlaıdy Aqordanyń baspasóz qyzmeti.
QR Qaýipsizdik Keńesiniń Áskerı qaýipsizdik jáne qorǵanys bólimi «Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń jalpy áskerı jarǵylaryn bekitý týraly» Qazaqstan Respýblıkasy Prezıdentiniń 2007 jylǵy 5 shildedegi №364 Jarlyǵyna ózgerister engizý týraly» Qazaqstan Respýblıkasy Prezıdentiniń 2016 jylǵy 2 aqpandaǵy № 187 Jarlyǵyna túsindirme jarıalady.
Túsindirmede osy Jarlyq Memleket basshysynyń tapsyrmasyna sáıkes, sondaı-aq qoldanystaǵy zańnamanyń ózgerýine jáne kúshtik qurylymdardyń qaıta uıymdastyrylýyna baılanysty ázirlengendigi atap ótilgen.
İshki qyzmet jarǵysy, Garnızondyq jáne qaraýyldyq qyzmetter jarǵysy, Tártiptik jarǵy jańa redaksıada jazyldy.
İshki qyzmet jarǵysynda áskerı qyzmetshilerdiń jalpy quqyqtary men mindetteri jáne qarýdy qoldaný tártibi keltirilgen. Ol ishki tártipti, áskerı qyzmetshilerdiń jalpy quqyqtaryn, mindetterin, negizgi laýazymdy adamdardyń mindetterin aıqyndaıdy.
Garnızondyq jáne qaraýyldyq qyzmetter jarǵysynda garnızondyq jáne qaraýyl qyzmetterin uıymdastyrý men atqarýdyń, garnızondyq is-sharalar ótkizýdiń tártibi aıqyndalǵan. Jańa redaksıada garnızon bastyqtarynyń ókilettikteri men jaýapkershiligi keńeıtilgen.
Kelesi bir tolyqtyrý qylmystyq-atqarý zańnamasy sheńberinde áreket etetin ulttyq syndarly tetik qatysýshylary men qoǵamdyq-baqylaý komısıalary músheleriniń gaýptvahtalardy tekserýdi júzege asyrýyna ruqsat etý bolyp tabylady.
Áskerı qyzmetshilerdi jerleý jáne áskerı qurmet tutý rásimderi de naqtylandy.
Tártiptik jarǵyda áskerı tártip uǵymy men onyń máni, áskerı qyzmetshilerdiń áskerı tártipti ustanýdaǵy mindetteri, yntalandyrýlardyń, tártiptik teris qylyqtar men tártiptik jazalardyń túrleri, qyzmettik tergep-tekserý júrgizýdiń tártibi, áskerı qyzmetshilerdi jaýaptylyqqa tartýdyń tártibi aıqyndaldy.
Saptyq jarǵy azdap ózgeristerge ushyrady, onda sapta júrip-turý qımyldaryna qoıylatyn talaptar ózgerdi. Osyǵan sáıkes saptyq plastaǵy saptyq alańdy belgilep syzý ózgertildi.
Tutas alǵanda, Jarlyqty iske asyrý Qarýly Kúshter men basqa da áskerı quralymdardyń qyzmetin zańnamaǵa sáıkes keltirip, eldiń qorǵanys qabiletin nyǵaıtýǵa múmkindik beredi.
