Kásipkerler aldynda mıllıondaǵan teńge bereshegi bar memlekettik mekemeler qaryzyn qaıtarýǵa qulyqsyz, - dep habarlaıdy «Qamshy» portaly 24.kz-ke silteme jasap.

2015 jylǵy esep boıynsha, memlekettik mekemelerdiń jeke kásipkerlerge qaryzynyń kólemi mıllıard teńgege taıaǵan. Kimnen kómek suraryn bilmeı sandalǵan bıznesmender máselesin búgin Ulttyq kásipkerler palatasynyń arnaıy keńesi qarady. Belgili bolǵany, sot sheshimderindegi merzimge qaramastan, kóptegen mekeme qaryzyn ýaqtyly qaıtarmaıdy.

Al, jıynǵa qatysqan Ádilet mınıstrliginiń ókili sot oryndaýshylardyń kómegimen búginge deıin atalǵan qaryzdyń jartysynan astamy qaıtarylǵanyn aıtty. Endi keńes músheleri bul aqparattyń anyq-qanyǵyna kóz jetkizip, oblystyq prokýratýraǵa osyndaı isterge qatysty tyńǵylyqty tekseris júrgizýin surap otyr.

Oleg Savelenko, «Atameken» UKP Kásipkerler quqyǵyn qorǵaý departamentiniń dırektory:

- Kásipker barlyq isin ysyryp qoıyp, 1 nemese 1 jyldan astam ýaqyt sottasyp júrýge májbúr. Sáıkesinshe, ol bızneske belgili bir deńgeıde nuqsan keltiredi. Keıingi kezde dál osyndaı mazmundaǵy hattar kóp kelip jatyr. Aldaǵy ýaqytta joǵarydaǵy máselelerdiń barynsha rettelgenin, oraıy kelse, bolmaǵanyn qalaımyz.