«Almatynyń 1000 jyldyǵyna - 1000 izgilikti is» aksıasy aıasynda G38 jastar uıymyna múshe ál-Farabı atyndaǵy QazUÝ stýdentteri kezekti qaıyrymdylyq sharasyn júzege asyrdy. Shara barysynda kópbalaly otbasylarǵa dári satyp alýǵa qajetti sertıfıkattar tabys etildi, - dep habarlaıdy «Qamshy» portaly ýnıversıtettiń baspasóz qyzmetine silteme jasap.

Bul joly kópbalaly jáne áleýmettik az qamtylǵan 10 otbasyna qajetti dári-dármekter satyp alý úshin sertıfıkattar tabys etildi. Atalmysh joǵary oqý ornynyń stýdentteri aksıa bastalǵaly beri qaıyrymdylyq sharalaryna belsendi túrde atsalysyp júr. 

Ál-Farabı atyndaǵy QazUÝ jastar uıymdary komıtetiniń tóraıymy Aısulý Ernıazovanyń aıtýynsha, mundaı aksıalar jastarǵa ǵana emes barlyq qala turǵyndaryna úlgi bolady.

«ál-Farabı atyndaǵy QazUÝ stýdentteri qala jastarymen birlese otyryp, bıylǵy jyldyń sońyna deıin osy aksıaǵa qatysady. «1000 izgilikti is» aksıasynyń maqsaty - kóp balaly jáne áleýmettik az qamtylǵan otbasylaryna, jalǵyz basty qarttarǵa, Uly Otan soǵysynyń ardagerlerine, múmkindigi shekteýli jandarǵa, múgedek jáne jetim balalalarǵa kómek kórsetý», - dedi A. Ernıazova.

Budan basqa, ýnıversıtettiń belsendi jastary joǵary oqý oryndary men tehnıkalyq jáne kásiptik bilim beretin oqý oryndarynyń túlekterin jumysqa ornalastyrý, «Keńes» ortalyǵy arqyly olarǵa zańdyq aqyl-keńester berý, sondaı-aq, atalǵan oqý oryndarynda daıyndyq kýrstaryn uıymdastyrý jumystaryn da qolǵa aldy. 

Aldaǵy ýaqytta, jumys jospary kelip túsken usynystar men pikirler negizinde ázirlenetin bolady.