QR Parlament Senatynyń jalpy otyrysynda senator Serik Aqylbaı premer-mınıstr Kárim Másimovtyń atyna osyndaı saýal joldady dep habarlaıdy «Qamshy» portaly  baq.kz – ke silteme jasap. 

Patshalyq Reseıdiń otarlaýyna qarsy Qazaqstannyń barlyq aımaqtarynda halyq bas kótergen bolatyn. Solardyń ishinde Torǵaı dalasyndaǵy Ábdiǵappar Janbosynuly, Amangeldi Imanov, Keıki batyr bastaǵan el eń uzaq kóterilis júrgizgeni belgili.

Jas urpaqty patrıottyq pen otansúıgishtikke baýlý úshin batyrlar rýhyn jańǵyrtý kerek. Keńes dáýirinde ult-azattyq kóterilister týraly aıtylmaı keldi. Ókinishke oraı, búgingi kúni keı jastarymyz 1916 jylǵy kóterilis týraly, ony bastaǵan batyrlar jaıly tolyq bile bermeıdi. S.Aqylbaı endi osy olqylyqtyń ornyn toltyratyn kez kelgenin aıtady.

Ult bostandyǵy jolynda kúresken dańqty qolbasshylardyń biri, ataqty mergen Keıki batyr óz eli úshin basyn báıgege tikken tulǵa. Batyrdy qyzyl ásker aıýandyqpen óltirip, eki qoly men basyn kesip alǵan. Ult bozdaǵynyń basy áli kúnge Sank-Peterborda saqtaýly tur. 1995 jyly QR Syrtqy ister mınıstrligi suraý jibergende, Keıki babamyzdyń basy bar ekenin RF Syrtqy ister mınıstrligi de jaýap hatynda rastaǵan. Sóz sońynda senator, Keıki batyrdyń bas súıegin týǵan eline aldyrý máselesi kópten aıtylsa da nátıje shyqpaǵanyn kóldeneń tartty.

Bıyl ult-azattyq kóterilistiń júz jyldyǵy. Osyǵan oraı, Keıki batyrdyń bas súıegin elge qaıtaryp, týǵan jerine jerleý máselesin Úkimet qolǵa alsa deıdi Joǵarǵy palata múshesi.

Eske sala ketsek, depýtat Serik Aqylbaı Keıki batyrdyń basy tóńireginde buryn da birneshe márte qoǵam nazaryna oı tastaǵan bolatyn.