Elimizde 400 myńnan astam jumyssyzdar qatarynda. Sondaı-aq, 13 myń adam byltyr turaqty jumystarynan aırylǵan. Bul týraly densaýlyq saqtaý jáne áleýmettik damý vıse-mınıstri Birjan Nurymbetov habarlady.

«Bul 443 myń adam 1 qańtardaǵy jaǵdaı boıynsha jumyssyzdar sanatyndaǵy azamattar. Al, 2015 jyly jumyssyz qalǵandar týraly aıtar bolsaq, resmı málimetter boıynsha túrli kásiporyndardan 13 myń adam jumystan shyǵarylǵan», - deıdi mınıstr.

Alaıda, buǵan deıin Eýrazıalyq ekonomıkalyq qaýymdastyq esebinde ótken jyly elimizde 34 myń adam jumystan qysqarǵany týraly aıtylǵan edi. Buǵan qatysty vıse-mınıstr mınıstrlik tek qysqartý boıynsha jumystan shyǵarylǵandardy ǵana esepke alatyndyqtaryn jetkizdi.

«Eger bireýge jumysy unamaı, ol jumysynan shyǵyp ketse, bizdiń mınıstrlik ondaı málimetter jınaı almaıdy. Biz kóbinese qysqartýlar júrgen kásiporyndardy esepke alamyz. Zań boıynsha kásiporyndar jumysshylaryn qysqartatyny týraly jumyspen qamtý ortalyqtaryna habarlaýǵa mindetti. Biz osy arqyly esep júrgizemiz. Al, óz erkimen jumysynan shyqqandar, basqa jumysqa aýysqandardy esepke alý bizge qıynǵa túsedi», - deıdi Birjan Nurymbetov.

Nurymbetovtyń bul aıtqandarynan mınıstrlik pen onyń óńirlerdegi qurylymdary tek kásiporyndar usynǵan málimetterdi ǵana esepke alyp otyrýmen aınalysatynyn túsinýge bolady. Eshkimge eskertpeı-aq qysqartý júrgizgen kásiporyndardyń burynǵy jumysshylary mınıstrliktiń esebinde joq. Odan keıin, mınıstrlikke jumysshysyn qysqartatyn uıymdardyń qanshalyqty tolyq málimet usynatyny da kúmándi.