Somalıdegi bortynda jarylys bolǵan ushaqta qazaqstandyq eki azamattyń bolǵany anyqtaldy, - dep habarlaıdy «Qamshy» portaly Tengrinews.kz – ke silteme jasap.

Aıta keteıik, 2 aqpanda Somalı astanasy Mogadısho áýejaıynan kóterile bergende A321 ushaǵynyń bortynda jarylys bolǵan edi. Jolaýshylardyń biri ushaqtyń fúzelájdaǵy oıyqpen ushyp bara jatqan sátin vıdeoǵa túsirip alǵan bolatyn. Oqıǵanyń saldarynan eki adamnyń zardap shekkeni belgili boldy.

Saıt tilshisi ushaq bortynda Qazaqstannyń eki azamatynyń bolǵanyn anyqtady. Olar Almatydaǵy №405 Avıajóndeý zaýytynyń qyzmetkerleri - Sergeı Severın men Nıkolaı Bochkarev. Osy zaýyttyń dırektory Konstantın Ýshakov bul aqparatty rastady. Onyń aıtýynsha, qazaqstandyqtar Somalıge BUU tapsyrmasy boıynsha jumys isteıtin tikushaqty jóndeýge barǵan.

"Bizdiń qyzmetkerler jumys babymen onda jıi ushady. Bul joly da olar jumys babymen sonda baryp, Almatyǵa qaıtyp kele jatqan bolatyn. Olar zardap shekken joq. Oqıǵadan keıin birden baılanysqa shyqty. Ushaqtyń apatty jaǵdaıda qonǵanyn aıtty. Naqty ne bolǵany belgisiz. Qazir mamandar tergeý júrgizip jatyr", - dedi Ýshakov.

Onyń aıtýynsha, apatty qonýdan keıin qazaqstandyqtar BUU bazasyna qaıtadan baryp, qaıtadan jumys istegen. "Onda BUU qyzmetkerleri turady. Sondyqtan da bizdiń qyzmetkerler qaýipsizdikte. Olarmen únemi baılanystamyz", - dedi ol.

Qazir qazaqstandyqtar tergeý isine qatysty sharalardyń aıaqtalǵanyn kútip jatyr. "Qazir ol jaqta tekserister júrip jatyr. Bul terakt boldy degen boljam bar. Tergeý aıaqtalǵan boıda olar osynda ushyp keledi. Týystaryna habar beremiz, jaǵdaıdy baqylap otyrmyz", - dedi Ýshakov.