قازاقستان رەسپۋبليكاسىنىڭ قورعانىس ءمينيسترى يمانعالي تاسماعامبەتوۆ «شىعىس» وڭىرلىك قولباسشىلىعى، «شىعىس» سىناق الاعىندا ءوتىپ جاتقان «ايبالتا-2016» جەدەل-تاكتيكالىق كوماندالىق-شتابتىق وقۋ-جاتتىعۋىنا قاتىستى. اتالعان جەرگە بىرنەشە كۇن بويى ق ر قارۋلى كۇشتەرىنىڭ بارلىق وڭىرلىك قولباسشىلىعىنىڭ جاۋىنگەرلەرى تارتىلعان، - دەپ حابارلايدى «قامشى» پورتالى مينيسترلىكتىڭ باسپا ءسوز قىزمەتىنە سىلتەمە جاساپ.

دالالىق جاعدايدا جاتتىعۋ شارالارىن وتكىزۋ ءۇشىن اسكەرلەردى بىرىكتىرىلگەن تاسىلمەن 2 شاقىرىمنان 4 شاقىرىم قاشىقتىققا دەيىن جەتەتىن جاۋىنگەرلەر مۇلدەم بەيتانىس ايماققا تارتىلدى. سونداي-اق، «ءۇشارال» جەدەل اۋەجايىندا جاۋىنگەرلىك توپتار جاساقتالىپ، اتالعان وڭىرلىك قولباسشىلىعى «شىعىس» سىناق الاڭىنا شوعىرلاندى.

بولىمشەنىڭ تاجىريبەلىك ءىس-قيمىلى بارىسىندا توسقاۋىل-بەكەتتەردە وقشاۋلاۋشى-بۇعاتتايتىن شارالار يگەرىلىپ، شابۋىلداۋ ارەكەتتەرى جۇرگىزىلدى. «ايبالتا-2016» وقۋ-جاتتىعۋىنىڭ ەرەكشەلىگى قىستىڭ كۇردەلى جاعدايىندا بارلىق بولىمدەر مەن بولىمشەلەردىڭ تولىق قاتىسۋىمەن جاۋىنگەرلەردىڭ دالالىق ايماقتا جۇمىس جاساۋ داعدىسىن كۇشەيتۋ بولىپ تابىلادى.

ءبىرىڭعاي جوسپار بويىنشا جالپىاسكەرلىك بولىمشەلەردىڭ ارنايى تاپسىرمالارى زەردەلەندى. سونىمەن قاتار، مي-8، مي-17، ميگ-27، سۋ-30، سۋ-27، سۋ-25 ۇشاقتارىنا بارلاۋشى-سوققى بەرۋشى ارەكەتتەر جۇرگىزىلىپ، اۋە دەسانتشىلارىن ءتۇسىرۋ جانە دە اسكەريلەر شاڭعىدا وزىنە بەلگىسىز ايماقتا جاۋىنگەرلىك تاپسىرمالاردى ورىنداۋ ءۇشىن بولىمشەلەردى العا تارتۋ قيمىلدارى وتكىزىلدى.

«شيلكا» اتتى زەنيتتىك قوندىرعى 100 م-دەن 1500 م-گە دەيىنگى بيىكتىكتە ۇشۋ جىلدامدىعى سەكۋندىنا 450 مەترگە جەتەتىن اۋە ماقساتىنداعى اتىستى قامتاماسىز ەتتى.

قازىرگى زامانعا ساي بۇل كۇندە جاۋىنگەرلىك ءىس-قيمىلداردى جۇرگىزۋ ءۇشىن وعان قاتىسۋشى اسكەرلەر ۇنەمى بارلاۋ جۇمىستارىن جۇرگىزىپ، قارۋ-جاراق پەن اسكەري تەحنيكانى، جاسىرىنۋ مەن قورعانۋ قۇرالدارىن شەبەر قولدانا ءبىلۋى كەرەك. بۇل جاۋىنگەرلەردەن جوعارى بەلسەندىلىك پەن ۇيىمداستىرۋشىلىقتى، رۋح پەن فيزيكالىق كۇش جانە ءتارتىپ پەن اۋىزبىرشىلىكتى تالاپ ەتەدى. جاتتىعۋ كەزىندە قۇرامنىڭ 3000-نان استام اسكەري قىزمەتشىسى، 900-عا جۋىق اسكەري جانە وزگە دە تەحنيكا بىرلىگى، 20 بىرلىك شابىلداۋشى اۋەكەمەسى جانە 12 بىرلىك اسكەري ۇشاق جۇمىلدىرىلدى.

ودان بولەك، اسكەري قىزمەتشىلەر بارلىق بولىمشەلەردى بەلگىلەنگەن اۋداندارعا ىس-جۇزىندە شىعارىپ، جەدەل تاپسىرما اياسىندا مەملەكەتتىك شەكارانى كۇزەتۋدى كۇشەيتۋ بويىنشا وقىتۋ ماسەلەلەرىن پىسىقتادى.

بۇرىن سوڭدى بولماعان ءىرى وقۋ-جاتتىعۋعا اۋا-رايىنىڭ قولايسىزدىعىنا، قىستىڭ قىتىمىرلىعىنا قاراماستان تاباندىلىق پەن توزىمدىلىك تانىتا بىلگەن بارلىعى 5 مىڭعا جۋىق اسكەري قىزمەتشى جۇمىلدىرىلعانىن ەستەرىڭىزگە سالا كەتەيىك. وسى كەزەڭ ارالىعىندا بارلىعى 1 500-دەن اسا بىرلىك قارۋ-جاراق پەن اسكەري تەحنيكا جانە شامامەن 30 بىرلىك اۋە تەحنيكا تارتىلىپ، ءىس-قيمىلداردىڭ رەتتىلىگىن جانە جاتتىعۋدىڭ تۇپكى ويىن جۇزەگە اسىرۋى جەتىلدىرىلدى.

ەڭ ءىرى جاتتىعۋ قيمىلدارىنا وڭىرلىك قولباسشىلىق باسقارماسى ورگاندارى مەن اەروۇتقىر اسكەرلەرى، اسكەري اۋە كۇشتەرىنىڭ، ايماقتىق قورعانىس جانە بريگادا باسقارماسىنىڭ جەدەل توپتارى، ۇلتتىق قاۋىپسىزدىك كوميتەتىنىڭ شەكارا قىزمەتىنىڭ وكىلدەرى جانە دە ءىىم ۇلتتىق ۇلاندار تارتىلدى.

«ايبالتا-2016» ەڭ ءىرى وقۋ-جاتتىعۋى تۇڭعىش رەت ۇرىس كەزەڭىنە بارىنشا جاقىنداتىلعان جاعدايدا وتكىزىلگەنىن ايتا كەتۋ كەرەك.