داعدارىس دەپ ەلدەگى قارجىلىق قيىندىقتاردىڭ سەبەبىن سىرتتان ىزدەگەنمەن، ەل باسىنداعى شەنەۋنىكتەردىڭ كاسىبي شەبەرلىگىن تارازىعا سالماي تۇرا المايسىز. ەكونوميست ماعبات سپانوۆتىڭ دا پىكىرى وسىنداي.

«تۇراقتىلىقتى قاناعات ەتىپ وتىرا بەرۋگە بولمايدى. عىلىمدا «تۇراقتىلىق» دەگەن «العا جىلجىماۋ»، «ءبىر ورىندا تۇرۋ» دەگەن ماعىناعا يە. ءبىز ورتا ازيا بارىسىنا اينالۋىمىز ءۇشىن جاڭا شارالار مەن ادىستەرگە جۇگىنۋىمىز كەرەك»، - دەيدى ول.

101tv قوعامدىق ينتەرنەت-تەلەارناسىنا بەرگەن سۇحباتىندا ەكونوميست بۇگىنگى قازاق ۇكىمەتىنىڭ كاسىبي بىلىكتىلىگىنە كۇمانمەن قارايدى.

«جاقىندا ۇكىمەت بەكىتكەن جاڭا بيۋدجەت جوباسى سەناتقا جىبەرىلدى. ەكونوميكا ءمينيسترى ىشكى جالپى ءونىمنىڭ 0،5 پايىزعا ءوسۋى كولەمىندەگى قالىپتى ديناميكانى ساقتاپ قالدىق دەپ كەۋدەسىن سوعادى. مەن وعان ەكونوميكالىق وقۋلىقتار وقۋعا كەڭەس بەرەر ەم. ءىجو-نىڭ 1،1 پايىزعا ارتۋى ءوسىم ەمەس، ستاگناسيا سانالادى. ويتكەنى، ديەۆالۆاسيالىق، ينفلياسيالىق پروسەستەر بار. سوندىقتان ءبىز توقتاپ قالدىق»، - دەيدى م. سپانوۆ.

بيلىكتەگىلەردىڭ «الەۋمەتتىك تۇراقتىلىقتى ساقتاپ وتىرمىز» دەپ جۇرگەنى دە دالباسا كورىنەدى.

«ءىجو-نىڭ الەۋمەتتىك سالاعا بولىنەتىن ۇلەسى ۇنەمى قىسقارىپ كەلە جاتقاندا قانداي الەۋمەتتىك تۇراقتىلىق تۋرالى ايتۋعا بولادى؟ ەگەر، 2000 جىلدار باسىندا الەۋمەتتىك سالاعا ءىجو-نىڭ 4 پايىزى بولىنسە، بۇگىندە بۇل كورسەتكىش 3 پايىزدىڭ اينالاسىندا. بۇل تۇراقتىلىق ەمەس، بۇل تۇراقتى قۇلدىراۋ»، - دەگەن ەكونوميست ءسوزىن ءجونسىز دەي المايسىز.

ەكونوميست ەلدى العا سۇيرەۋ ءۇشىن ءبىلىمدى ۇكىمەت، ونى باسقاراتىن، بارلىق جاۋاپكەرشىلىكتى ءوز موينىنا الا الاتىن، ەكى-ۇشش جىل ىشىندە ەلدى قالىپتاسقان قيىندىقتان الىپ شىعۋعا شاماسى جەتەتىن بىلىكتى پرەمەر-مينيستر كەرەك دەپ سانايدى.