بۇگىن جالعاسقان ەكس-پرەمەر سەرىك احمەتوۆتىڭ اپەللياسيالىق سوتىندا ايىپتاۋشىلار العاشقى سوت ينستانسياسىنىڭ ۇكىمىن وزگەرىسسىز قالدىرۋدى سۇرادى، - دەپ حابارلايدى «قامشى» پورتالى ينفورمبيۋروعا سىلتەمە جاساپ.

اپەللياسيالىق سوتتا بارلىعى 12 ايىپتالۋشىنىڭ شاعىمى قارالۋدا. بۇگىن تۇسكى ساعات ۇشتە باستالعان سوت وتىرىسىندا پروكۋرورلار شاعىم بويىنشا قورىتىندىنى وقىدى. بۇل قورىتىندى كەشە وقىلۋى ءتيىس بولعان. الايدا، ايىپتالۋشىلاردىڭ ادۆوكاتتارى جاساعان مالىمدەمەلەرگە بايلانىستى بۇگىنگە قالدىرىلعان ەدى.

پروكۋرورلار ايىپتالۋشىنىڭ كەلتىرىلگەن شىعىن سوماسىن قايتارعانىنا قاراماستان احمەتوۆ پەن باسقا دا ايىپتالۋشىلاردىڭ جازاسىن وزگەرىسسىز قالدىرۋدى سۇرادى.

«ۇكىم وزگەرىسسىز، قورعاۋشىلاردىڭ اپەللياسيالىق شاعىمى قاناعاتتىندىرۋسىز قالدىرىلسىن. ۇكىمدى وزگەرتۋگە سەبەپ بولاتىن قىلمىستىق-پروسەسسۋالدىق كودەكستى بۇزۋ بەلگىلەرى انىقتالمادى. ايىپتالۋشىلاردىڭ كىنالارى دالەلدەندى. ايىپتالۋشىلار مەن قورعاۋشىلاردىڭ پىكىرلەرى العاشقى سوت ينستانسياياسىندا تىڭدالىپ، زەردەلەندى جانە جەتكىلىكسىز دەپ تانىلدى»، - دەيدى مەملەكەتتىك ايىپتاۋشى تاراپ.

سونداي-اق، پروكۋرورلار ۇكىمنەن ەكى سوتتالۋشى – قاراعاندى اكىمىنىڭ بۇرىنعى ورىنباسارى ايدار تەلعارين مەن «سارىارقا» اكك» ۇلتتىق كومپانياسىنىڭ بۇرىنعى دەپارتامەنت باسشىسى ەرلان قيسىقوۆتىڭ مۇلكىن تاركىلەۋدى الىپ تاستاۋدى سۇرادى.

اپەللياسيالىق القا 14 ناۋرىز كۇنى اتالعان ءىس بويىنشا قاۋلى قابىلدايتىنى بەلگىلى بولدى.

ەستەرىڭىزگە سالساق، قازاقستاننىڭ بۇرىنعى پرەمەر-مينيسترى س. احمەتوۆ 10 جىلعا باس بوستاندىعىنان ايرىلىپ، سوت مۇلكىن تاركىلەۋ تۋرالى شەشىم شىعارعان ەدى. احمەتوۆتەن باسقا قاراعاندى وبلىسىنىڭ بۇرىنعى اكىمى باۋىرجان ابدىشيەۆ، قاراعاندى قالاسىنىڭ بۇرىنعى اكىمى مەيرام سماعۇلوۆ، تاعى بىرنەشە لاۋازىمدى تۇلعا كىنالى دەپ تانىلىپ، ءتۇرلى مەرزىمدەگى جازاعا تارتىلدى.

اپەللياسيالىق القا وتىرىسىنىڭ الدىندا س. احمەتوۆتىڭ تۋىستارى مەن دوستارى قىلمىستىق ارەكەتتەر سالدارىنان كەلتىرىلدى دەگەن شىعىن – 2،2 ملرد تەڭگەنى قايتارعانى بەلگىلى بولدى.