استانادا ۇلى جىبەك جولى ەلدەرىنىڭ «قۋات، رەسۋرستار جانە تۇراقتى دامۋ» تاقىرىبىنداعى فورۋمى ءوتتى. فورۋمعا تاۋەلسىز ساراپشى رەتىندە قاتىسقان ەرمەك نيازوۆ جىبەك جولىن جاڭعىرتۋ يدەياسى ءدال قازىرگى ۋاقىتتا، ەلىمىزدە بولىپ جاتقان جاعدايلارعا جانە وسىدان ءۇش جىل بۇرىنعى ۋكراينانىڭ احۋالىمەن تىكەلەي بايلانىستى دەپ ەسەپتەيدى. بۇل تۋرالى Qamshy.kz Bnews.kz – كە سىلتەمە جاساپ حابارلايدى.

الەمدەگى ءىرى ەكونوميكالىق ويىنشىلاردىڭ جۇتىلىپ كەتپەي، وزدەرىن ساقتاپ قالۋىنىڭ باستى تەتىگى - جاڭا ساۋدا-ساتتىق نارىقتارىن ىزدەستىرۋ. بۇل جاعدايدا ەڭ ءتيىمدى نارىق – ەۋرووداق.  ال وسى ۇلكەن نارىقتى «جاۋلاۋ» 2013 جىلدىڭ 8 اقپانىندا باستالعان بولاتىن. سول كۇنى اقش پەن ەو ترانساتلانتيكالىق ساۋدا جانە ينۆەستيسيالىق سەرىكتەستىك قۇرۋ تۋرالى شەشىم قابىلداعان ەدى.

ءبىراق، وسى تۇستا جىبەك جولى يدەياسى پايدا بولدى. 2013 جىلدىڭ قىركۇيەگىندە سي سزين پين جولداس ورتالىق ازيا ەلدەرىنە جاعالاي ساپار جاساپ، قازاقستان، تۇركىمەنستان، وزبەكستان، تاجىكستان، قىرعىزستان باسشىلارىمەن كەزدەستى. ءسويتىپ، بەيجىڭگە جالپى قۇنى 60 ملرد دوللاردان اساتىن كەلىسىم-شارتتارمەن ورالدى.  ولاردىڭ اراسىندا تەمىرجول جانە اۆتوجولدار قۇرىلىسى دا بار. جىبەك جولىن قۇرۋ جۇمىستارى جاندانىپ، ورتالىق ازيا وداقتاسقا اينالدى.  رەسەي تاراپىنان كەدەرگى بار دەپ ايتۋعا بولمايتىن. جۇڭگو مەن ەۋرووداق اراسىنداعى ۇلى جىبەك جولىندا جالعىز عانا توسقاۋىل  ۋكراينا بولىپ قالا بەردى.

الايدا، اككى ساياساتكەر سول كەزدەگى ۋكراينانىڭ پرەزيدەنت يانۋكوۆيچ ۇلى جىبەك جولى يدەياسىن قىزۋ قولدادى.  اراداعى ۋاعدالاستىق بىلاي ەدى (قىتايلىق باسىلىمداردىڭ مالىمەتتەرى بويىنشا): قحر ەۆپاتوريا اۋدانىندا جۇك اينالىمى جىلىنا 140 ملن توننا بولاتىن قىرىم تەرەڭسۋلى پورت سالادى. كوپتوننالىق كەمەلەردىڭ ءوتۋى ءۇشىن 9 شاقىرىمدىق كانال وتكىزەدى.  وعان قوسا اۋەجاي، ۆەرفتەر، مۇناي وڭدەۋشى جانە سۇيىتىلعان گاز شىعاراتىن زاۋىتتار، تەرمينالدار، Iت-كومپانيالار، جاعاجايلار، وقۋ ورتالىقتارىن جانە ت.ب. تۇرعىزۋى ءتيىس.

قۇرىلىسقا 2014 جىلدىڭ سوڭىندا كىرىسپەكشى بولدى.  مەردىگەر رەتىندە الەمگە ايگىلى ميللياردەر ۆان ءسزيننىڭ نيكاراگۋا كانالىن سالاتىن HKND Group كومپانياسى تاڭداپ الىندى.

الايدا ۆ.يانۋكوۆيچ ۆاشينگتوننىڭ رەاكسياسىن ەسكەرمەگەن. ول ىسكە قوسىلعاندا ۆ.يانۋكوۆيچ ەس جيىپ ۇلگەرمەدى:

ءبىر اق كۇندە مايدانعا «وڭشىل سەكتور» سودىرلارى مەن ارنايى نۇسقاۋشىلاردىڭ شەكپەنىنەن شىققان ءتۇرلى استىرتىن ۇيىمدار قاپتاپ كەتتى. مەملەكەتتىك حاتشىنىڭ كومەكشىسى نۋلاند سودىرلاردىڭ ورتاسىندا بولىپ، ولاردى ىنتالاندىرىپ، ۇكىمەتكە قارسى كۇشتەردىڭ جاعىنا اشىقتان-اشىق شىعىپ الدى. ونىڭ ارتى نەمەن اياقتالعانى ايداي الەمگە ءمالىم. ۆ.يانۋكوۆيچتىڭ قاشپاسقا امالى قالمادى.

سوڭعى ۋاقىتتا، قازاقستاندا قحر قاتىستى اياق استىنان تۋىنداعان نارازىلىق پەن قىتايلارعا قارسى ۇلتتىق قوزعالىستاردان بىرەۋدىڭ سىرتتان سىنا قاعىپ، وتپەن ويناپ وتىرعانىن بايقاۋعا بولادى. بۇل جەردە الگى كوزگە كورىنبەيتىن جەكسۇرىن مەكەمەنىڭ قۇلاعى  قىلتيىپ تۇرعانداي.  سابارى ساقتاپ ءسال ويلانىپ قاراساق، «بۇل كىمگە ءتيىمدى؟» نەمەسە دالىرەك ايتقاندا، «قحر-قر-رف ساۋدا وداعى مەن "باتىس قىتاي-باتىس ەۋروپا" جوباسىنىڭ ىسكە اسىرىلۋى كىمگە ءتيىمسىز؟» دەگەن وي جەتەلەيدى.