رۋحاني ورتادا «امبەباپ ادەبيەتشى» اتانعان اقىن، اۋدارماشى، سىنشى، مادەنيەتتانۋشى، فيلوسوفيا عىلىمدارىنىڭ كانديداتى اۋەزحان قودار دۇنيەدەن وزدى، - دەپ حابارلايدى Qamshy.kz.

اۋەزحان ءابدىرامان ۇلى قودار 1958 جىلى 12 ماۋسىمدا قىزىلوردا وبلىسى، قارماقشى اۋدانى، قارماقشى سوۆحوزىندا دۇنيەگە كەلگەن. 1982 جىلى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن بىتىرگەن. 1982–1985 جىلدارى قىزىلوردا وبلىسى قارماقشى اۋاتكومىنىڭ جاسوسپىرىمدەر جونىندەگى كوميسسيانىڭ حاتشىسى، زاڭگەر. 1985 جىلدان باستاپ تۋىندىلارى رەسپۋبليكالىق جانە وداقتىق باسپاسوزدە جاريالانا باستادى. 1986 جىلى رەسپۋبليكالىق شىعارماشىلىق جاستاردىڭ «جىگەر» فەستيۆالىنىڭ لاۋرەاتى. 

1989–1994 جىلدارى قازاقستان جازۋشىلار وداعى جانىنداعى كوركەم اۋدارما جانە ادەبي بايلانىستار جونىندەگى رەداكسيالىق باس القاسىندا ورىس ءبولىمىنىڭ مەڭگەرۋشىسى قىزمەتىن اتقارادى. 1994 جىلدان بەرى قازاقستان حالىقتارىنىڭ مادەنيەتىن قورعاۋ جونىندەگى «التىن عاسىر» قوعامدىق بىرلەستىگىنىڭ پرەزيدەنتى. 1995–1997 جىلدارى م.و.اۋەزوۆ اتىنداعى قازاق اكادەميالىق دراما تەاترىنىڭ كوركەمدىك كەڭەسىنىڭ مۇشەسى. 1997–1998 جىلدارى نەمىس تەاتر اكادەمياسىندا فيلوسوفيا تاريحىنان ساباق بەرەدى. 1999 جىلدان بەرى «تامىر» جۋرنالىنىڭ باس رەداكتورى. 1999–2001 جىلدارى سوروس–قازاقستان حالىقارالىق قورىنىڭ باسقارما مۇشەسى.

ەڭبەكتەرىن قازاق جانە ورىس تىلىندە جازادى. «تۋعان كۇن»، «اقەدىلدىڭ انتى» پەسالارىنىڭ (1986)، «قاناتتى ورنەك» (1990)، «اباي (يبراھيم) قۇنانبايەۆ» جيناعىنىڭ (1996)، «ەسكە الماۋ شەڭبەرى» (1998)، «قازاق ادەبيەتىنىڭ تاريحىنا شولۋ» (1999) كىتابىنىڭ، «قاناعات قاعاناتى» جيناعىنىڭ (1994) اۆتورى. ورىس تىلىنە اباي، ماعجان، ج.جاقىپبايەۆتىڭ شىعارمالارىن اۋدارعان. قازاق تىلىنە ە.ءزامياتيننىڭ «اتيللا» دراماسىن، م.حايدەگگەر مەن ح.گاسەتتىڭ فيلوسوفيالىق جۇمىستارىن، ك.شۆيتتەرستىڭ ولەڭدەرىن اۋدارعان. «باتىس فيلوسوفياسى انتولوگياسىنىڭ» اۆتورى جانە ۇيىمداستىرۋشىسى. «استانا» مەدالىمەن ماراپاتتالعان (1998). «پاراسات» وردەنىنىڭ يەگەرى (2006).