ادەتتە «ەگەمەن قازاقستان» گازەتىن «باس گازەت»، «ەل گازەتى» دەپ جاتامىز. عاسىرعا جۋىق تاريحى بار، قازاق جۋرناليستيكاسىنىڭ سانداعان بۋىنى ءۇشىن شىعارماشىلىق شەبەرلىكتىڭ ناعىز ۇستاحاناسى بولعان باسىلىم جاڭا زامان اعىمىندا ءبىرشاما كىبىرتىكتەپ قالعانىن وقىرمان قاۋىم عانا سەزىپ وتىرعان جوق، قالام ۇستاعان جىگىتتەردىڭ ءوزى دە مويىندايدى. باس باسىلىمنىڭ نارىقتىق جۇيەگە تەز بەيىمدەلىپ، باسەكەگە قابىلەتتىلىك باعالاناتىن جاڭا قوعام ۇدەرىسىنە جىلدام ەرۋىنە شىعارماشىلىق الەۋەتى، جۋرناليستەردىڭ قارىم-قابىلەتى ەمەس، ەڭ الدىمەن كەشەگى كەڭەستىك سانانىڭ سارقىنشاعى، مەملەكەتتىك بيۋروكراتيزم كەدەرگى بولعانىن بارلىعىمىز كورىپ، ءبىلىپ وتىرمىز.
ەلباسى جارلىعىمەن جاقىندا عانا قۇرىلعان اقپارات جانە كوممۋنيكاسيا مينيسترلىگىنىڭ باسشىسى داۋرەن ابايەۆ اقپارات سالاسىنداعى جۇمىسىن «ەگەمەننىڭ» پرەزيدەنتىن اۋىستىرۋدان باستاعانىن اركىم ءار قيلى قابىلداعان بولار. جاس باسشىنىڭ باتىل قادامدارىن دۇرىس قابىلداماۋشىلىق ورىن الىپ جاتۋى دا مۇمكىن. ءساۋىر ايىندا عانا باسشىسى اۋىسقان باسىلىمدا كادرلىق ءاۋىس-تۇيىس جاساۋدىڭ نەگىزگى ماقساتى دا وسى گازەتتى زامان كوشىنەن قالدىرماي، شىن مانىندەگى «باس گازەتكە» اينالدىرۋ دەپ بىلەمىز. گازەت باسشىلىعىنا بەلگىلى عالىم، قارىمدى پۋبليسيست دارحان ءقىدىرالىنىڭ تاعايىندالۋىن قوعام دا جاقسى قابىلدادى. الەۋمەتتىك جەلىدە، باسپاسوزدە بۇل وقيعا ەرەكشە اتاپ وتىلۋدە. ءتىپتى، مەملەكەت ساياساتىن اشىق سىناپ جۇرگەن كەي ساياساتكەرلەر دە بۇل تاعايىنداۋدان ءۇمىت كۇتەتىندەرىن جازىپ جاتىر. ەسىمى ەل ىشىندە عانا ەمەس، حالىقارالىق شەڭبەردە تانىلعان، تۇركى تىلدەس ەلدەردىڭ مادەني، تاريحي بايلانىسىن نىعايتۋ، جالپىتۇركىلىك قۇندىلىقتاردى ناسيحاتتاۋ باعىتىندا قىرۋار ءىس تىندىرعان تاريحشىنىڭ الدىندا «ەگەمەندى» ەلدىڭ سۇيىكتى باسىلىمىنا اينالدىرۋ مىندەتى تۇر. دارحان ءقىدىرالى مىرزا ول مىندەتتى دە ويداعىداي اتقارىپ شىعارىنا كۇمانىمىز جوق. كەشەلى بەرى گازەت ۇجىمىندا شىعارماشىلىق، تەحنيكالىق قىزمەتكەرلەر جيىندارى وتكىزىلىپ، گازەتتىڭ بەدەلىن كوتەرۋ، زامانعا ساي ءادىس، تاسىلدەردى مەڭگەرۋ، الەۋمەتتىك جەلىلەردىڭ مۇمكىندىگىن پايدالانۋ سىندى ناقتى ماسەلەلەردىڭ ءسوز ەتىلگەنىن ەستىپ جاتىرمىز.
تاعى ءبىر جاعىمدى جاڭالىق – ەلىمىزدىڭ نەگىزگى اقپارات اگەنتتىكتەرىنىڭ ءبىرى «قازاقپارات» اگەنتتىگى باسشىسىنىڭ اۋىسۋى. وتاندىق ينتەرنەت جۋرناليستيكانىڭ كوشباسشىسىنا لايىق قىزمەت اتقارىپ وتىرعان ۇجىمنىڭ ەڭبەگى ءتيىستى باعاسىن الىپ ءجۇر دەي المايمىز. ءتىپتى، سوڭعى جىلداردا اقپارات قۇرالىنىڭ قىزمەتكەرلەرىنىڭ جالاقىدان دا قيىندىق كورىپ جۇرگەنىن ەستىپ ءجۇرمىز. مينيستر اگەنتتىك باسشىسىن اۋىستىرعاندا وسى ماسەلەلەردى ەسكەرگەن بولۋى كەرەك. «قازاقپارات» باسشىلىعىنا كەلگەن اسەل تولەگەنوۆانىڭ ەسىمى جۋرناليستيكاداعى جاڭا تولقىن وكىلدەرىنە دە، اعا بۋىنعا دا جاقسى تانىس. «تەنگرينيۋس» سىندى اقپارات الىبىندا شىڭدالعان اسەلدىڭ قازاقپاراتتى دا قازاقستاندىق اقپارات قۇرالدارىنىڭ كوشباسشىسىنا اينالدىرۋعا مۇمكىندىگى جوق ەمەس.
قازاق باسىلىمدارىن جىبەرمەي وقيتىن، اركەز تىلەكشى بوپ جۇرەتىن قاراپايىم وقىرمان رەتىندە ەلدىڭ نەگىزگى اقپارات قۇرالدارىنىڭ باسشىلىعىنا تاعايىندالعان دارحان ءقىدىرالى مەن اسەل تولەگەنوۆانى جاڭا لاۋازىمدارىمەن قۇتتىقتاي وتىرىپ، قىزمەتتەرىنە تابىس تىلەيمىن! قوس جەتەكشى اتالعان باق-تاردىڭ باسىنا ب ا ق بوپ قونعان باسشى بولسىن!
ياحيا ءجۇسىپ
