«قازاقستان ايتىس اقىندارى» دەپ ايقايلاتىپ كىتاپ جازعاندارىن قايتەيىن، ىشىندە شىنبولات دىلدەبايەۆ جوق! كىتاپتى قولىما العاندا بىردەن شىنبولاتتى ىزدەدىم. تاپپادىم. كىتاپتى ورنىنا قويا سالدىم. ءجۇرسىن اعامىز شىنبولاتتى ۇمىتۋى مۇمكىن ەمەس ەدى. زامانىندا بىر-بىرىمەن ارالاسقان ادامدار عوي. كەزىندە ن.نازاربايەۆقا ارناۋ جازىپ، ارناۋىندا بار قازاقتىڭ مۇقتاجىن جوقتاعان شىنبولات ەدى. كسرو قىلىشىن سۇيرەتىپ تۇرعاندا "شىندىق" دەپ جىرلاعان شىنبولات ەدى. ن.نازاربايەۆ جەزقازعانعا كەلگەن سايىن كەزدەسەتىن شىنبولات ەدى. كىتاپتان تابا الماعانىمىز وكىنىشتى. كەزىندە شىنبولاتتىڭ «شىندىعىن» تىڭداعان حالىق قاھارمانى قاسىم قايسەنوۆ «سەن شىن مانىندە بۇل بەيباستاق سويقان زاماننىڭ بۇگىنگى بۇقار جىراۋىسىڭ. سەن ءوزىڭنىڭ ادىلەتتى اڭساۋىڭمەن، شىنشىلدىعىڭمەن، بەت قاراتپاس قايسارلىعىڭمەن، ادامگەرشىلىك پاراساتتىلىعىڭمەن، جىرشىلىق مانەرىڭمەن قازاق ونەرىنىڭ اسپانداپ تۇرعان جۇلدىزدارىنىڭ ەڭ جارقىراپ، كوزگە تۇسەرىسىڭ! سەنىڭ اتىڭدى قويعان ادامنىڭ تەگىن ادام ەمەس ەكەنى دە كوڭىلگە ريزاشىلىق ۇيالاتادى» دەپ جۇرەكجاردى پىكىرىن بىلدىرگەن ەكەن. سويلە، ءتىلىم، الاڭداما، تارتىنبا، نايزاعايداي شىندىقتى ايتىپ جارقىلدا! قالاي عانا ءومىر ءسۇردىم دەي الام، ءبىر اۋىز ءسوز قالماعان سوڭ ارتىمدا؟!- دەپ باستالاتىن تولعاۋدى ەستىگەن قازاقتىڭ كوزىنە جاس الماعانى كەمدە كەم. حالىقتىڭ ويىنداعى، كوڭىلىندەگى، جان تۇكپىرىندەگى شىندىقتى ءدوپ باسقان شىنبولاتتاي اقىن ءدال سول كەزدە بولمادى. اقىن ءبىر عانا «شىندىقپەن» شەكتەلىپ قالمادى. جىرلارىن جالعاستىرىپ، «اشىنۋ»، «ۇيات بولدى-اۋ!» اتتى ولەڭدەرىن ومىرگە اكەلدى. بۇل جىرلارىندا دا قازاقتىڭ مۇڭى، قوعامنىڭ دەرتى، زاماننىڭ قيىندىعى اشىق كورىنىس تاپتى. اقىننىڭ بۇل تولعاۋلارىنا باستى ورتاق تاقىرىپ – ۇلتتىڭ كەلەشەگى، قازاقتىڭ ساناسىنىڭ ويانۋى ارقاۋ بولدى. اقىن وسىنىسىمەن ۇيىقتاپ جاتقان قالىڭ ەلدى ءدۇر سىلكىندىردى. «شىندىقتى» جاتتاپ الماعان بالا، ايتپاعان كارى-جاسى قالمادى. «شىندىق» قازاقتىڭ بويىنا قان بولىپ جۇگىردى. اقىن بۇركىت ىسقاقوۆ «ءمىرجاقىپ دۋلاتوۆتىڭ «ويان قازاق» جىرىنان كەيىن باتىل دا اششى جىر ول شىنبولاتتىڭ «شىندىق» تولعاۋى بولدى. از عانا ۋاقىتتىڭ ىشىندە بۇل جىر الىس شەت ەلدەرگە تاراپ كەتتى» دەپ جازادى. راسىمەن دە، شىنبولاتتاي شىندىقتى كورسەتكەن اقىندار سيرەك. داستارحان باسىنداعى ليريكالىق اندەردەن باسقانى قالامايتىن كەڭەستىك يدەولوگيا ءۇشىن مۇنداي تولعاۋلار جاي وتىنداي ەدى. جازۋشى شەرحان مۇرتازانىڭ ءوزى شىنبولاتتى ماحامبەت پەن اقتامبەردى جىراۋلاردىڭ جالعاسى دەپ بىلەتىندىگىن ايتىپ، ەرەكشە قۇرمەتتەۋى وسىدان بولسا كەرەك. بۇگىنگىلەر قاسىم مەن شەرحاننان، بۇركىتتەن ارتىق پا ەكەن؟! كىتاپقا قوسپاعانى ۇيات بولدى!
نۇرسەرىك جولبارىس
