جانار ساعات قىزى  ۇرىمجىدە تۋىلعان. مەكتەپتى پەكيندە ءتامامداعان. 1987 جىلى پەكين تەاتر ينستيتۋتىنا  وقۋعا تۇسكەن ول  ءبىر جىلدان كەيىن ماسكەۋدىڭ مەملەكەتتىك كينو ينستيتۋتىنىڭ رەجيسسەر ماماندىعىنا وقۋعا اتتانادى. ماسكەۋدە ينستيتۋت بىتىرەر كەزدە ديپلومدىق جۇمىس رەتىندە تۇسىرگەن «اپتانىڭ سەگىزىنشى كۇنى» دەگەن ءفيلمى كينو مەرەكەسىنىڭ ۇزدىك اۆتورلىق سىيلىعىن ەنشىلەيدى. رەسەي مەن يتاليا بىرلەسىپ جاساعان «ايۋدىڭ دوسى – دجوناتان» دەگەن فيلمدە قوسالقى رولگە، رەسەيدىڭ «بۋددا ارۋاعىنىڭ ورالۋى» اتتى فيلمىندە باستى رولدە ويناپ، ۇزدىك ونەرىمەن كوزگە تۇسەدى. زەرەكتىگى، بىلىمدىلىگى، جۇڭگو، ورىس تىلدەرىندە ەركىن سويلەيتىن تالانتتىلىعىمەن رەسەيدىڭ «مير» حالىقارالىق تەلەارناسىندا  ديكتور بولىپ جۇمىس ىستەيدى. ماسكەۋدە 9 جىل وقىپ، رەجيسسەرلىك ماماندىقتىڭ قىرى مەن سىرىن ابدەن مەڭگەرگەن قازاق قىزى جانار قىتايعا بارعاندا ۇلكەن سۇرانىسقا يە بولادى. وستروۆسكييدىڭ «قۇرىش قالاي شىنىقتى» رومانىنىڭ نەگىزىندە جاسالعان ءفيلمدى ۋكراينادا 270 كۇن تۇسىرەدى. 20 سەريالدى اتالمىش فيلم قىتايدا ۇلكەن قىزىعۋشىلىق تۋعىزادى. مۇنىمەن قوسا،  «قىزىل شيە»، «قىزىل عاشىقتار»، «كەشكەن كۇندەر»، «كۇنباعىس تالانى»، «رەسپۋبليكا قارساڭى»، «قالا كەڭىستىگىندە شوشىنعان قۇس»، «اسكەري كىسىنىڭ قۇپياسى»، «الىس كەتكەن ەرتەڭگى كۇن»  سەكىلدى  مەملەكەتتىك دەڭگەيدە تۇسىرىلگەن فيلمدەردىڭ رەجيسسەرى، اتقارۋشى رەجيسسەرى، قوسالقى رەجيسسەرى بولادى.