دەپۋتاتتاردىڭ قىلىقتارىنا كۇلكىم كەلەدى. پارلامەنتكە العاش سايلانىپ كەلگەندە ولار وزدەرىن كەرەمەت تۇلعاعا اينالعانداي سەزىنىپ، شىكىرەيىپ، بەس قاپ بوپ جۇرەدى. پارلامەنتتە رەسمي تىركەلگەن 400-دەن استام ب ا ق وكىلى، جۋرناليستەر بار. كەزەكتى وتىرىستان سوڭ ءماجىلىس زالىنان شىعا كەلگەندە قاپتاعان جۋرناليست ميكروفون ۇسىنىپ، كامەرالارى مەن فوتواپپاراتتارى سارتىلداپ، سينحرون، سۇحبات الۋعا دايار تۇرادى. جاڭادان دەپۋتات بولعاندار العاشىندا ولارعا كوز قىرىن دا سالمايدى. ءبىرلى-جارىم ساۋال تاستاسا، «ۋاقىتىم جوق» دەپ وپ-وتىرىك ماڭعازدانا قالادى، بىردەمە تىندىرىپ تاستاعانداي. 

الايدا، ولاردىڭ مۇنداي تىرلىكتەرى الىسقا بارمايدى. كەيىن جۋرناليستەر دە ولارعا قىرىن قاراپ، ەسەلەرىن ابدەن قايتارادى. پارلامەنت جۇمىسى قىزا ءتۇسىپ، ءبىرشاما ۋاقىت وتكەننەن كەيىن الگى بەس قاپ بولىپ جۇرگەندەر جۋاسىپ قالادى. ونداي دەپۋتاتتار زالدان شىعا سالىپ، جاۋتاڭ-جاۋتاڭ قاعىپ، ب ا ق وكىلدەرىنە قاراعىشتاپ، ءجۇرىسىن باياۋلاتىپ بارا جاتقانىن كورەسىڭ. اسىرەسە، «قازاقستان» ۇلتتىق ارناسى، «حابار» اگەنتتىگى، «ەگەمەن قازاستان»، «زاڭ گازەتى»، «ايقىننىڭ» تىلشىلەرىنىڭ قاسىنان وتكەندە جالىنىشتى كەيىپپەن ۇمىتتەنە كوز تاستايدى. ءوز كەزەگىندە، ەندى، جۋرناليستەر ولاردى پىسقىرماي قويادى. سەبەبى، ونداي دەپۋتاتتاردىڭ ايتار ەشتەڭەسى جوق ەكەنىن وتىرىستاردان بايقاپ ءبىلىپ العان. وتىرىستاردا ءجونى ءتۇزۋ پىكىر ايتپاعان، ۇكىمەتكە باتىل تۇردە ساۋال جولداماعان دەپۋتاتتارعا ۇيىندەگى قاتىن، بالا-شاعاسى دا مازا بەرمەيتىن بولسا كەرەك. «پالەن دەگەن دەپۋتاتتى تەلەديداردان كۇندە كورسەتەدى. ال، سەن جوقسىڭ، كورىنبەيسىڭ» دەگەندەي. 

نەگىزى، حالىققا جاعۋ ءۇشىن ءاۋ باستان باق-قا جاقىن بولۋدى، دەپۋتات دەگەن جوعارى لاۋازىمدىق ءمانساپ ەمەس، «كوپتىڭ ءبىرى، بىردەمەنىڭ كىرى» ەكەنىن دەر كەزىندە تۇسىنبەگەن دەپۋتات وسىلايشا «ساياسي ولىك» بولىپ سەسسيانى قالاي باستاسا، اقىرى سول كۇيى اياقتايدى.

قۋاندىق شاماحاي ۇلىنىڭ فەيسبۋكتەگى پاراقشاسىنان الىندى