«اليۋمينيي حانىمى» اتانعان گۇلجان
«قازاقتا بايتال شاۋىپ، بايگە الماس» دەگەن ماقال بار. بۇل ماقالدىڭ كىمگە قاراتا ايتىلعانى تۇسىنىكتى، دەسەك تە، ايداي الەمدى اۋزىنا قاراتقان قازاقتان شىققان ىسكەر ايەل گۇلجان مولداجانوۆاعا مۇنىڭ ەش قاتىسى جوق سەكىلدى. ونىڭ مانسابى بۇگىندە قازاق قىزدارىنىڭ اۋزىنىڭ سۋى قۇرىپ ايتاتىن اڭگىمەسىنە اينالدى. شىنىندا دا، كەز كەلگەن باستىقتىڭ قابىلداۋ بولمەسىندە سىزىلىپ وتىراتىن حاتشى قىزعا قاراپ، «كەيىن وسى قىز الەم مويىنداعان ىسكەر ايەل بولار-اۋ» نەمەسە «اتاعى دارداي وسى حولدينگتىڭ تىزگىنى ءبىر كۇنى مىنا قىزدىڭ قولىنا تيەر-اۋ» دەپ ويلاۋىمىز نەعايبىل. ال سولاي بولسا شە؟ دۇرىسى سولاي بولدى. گۇلجاننىڭ تاعدىرى «زولۋشكانىڭ» تاعدىرى تەكتەس. تاۋىسپاعان وقۋى جوق. ىزدەندى. ءسويتىپ، ءبىلىم باسپالداقتارىنان باستالعان ونىڭ قادامى كەيىن بيزنەس باسپالداقتارىنا وڭاي ىلىكتى...
امەريكانىڭ Fortune اتتى ىسكەر جۋرنالى جاريالاعان الەمنىڭ ەڭ ىقپالدى دا ىسكەر ەلۋ ايەلىنىڭ ءتىزىمىنىڭ العاشقى وندىعىنان ويىپ تۇرىپ ورىن العان قازاق قىزى گۇلجان مولداجانوۆا كەزىندە رەسەيلىك «بازوۆىي ەلەمەنت» حولدينگىنىڭ باس ديرەكتورى بولعان. ول باسشىلىق ەتكەن ۋاقىتتا كومپانيانىڭ تابىسى ەسەلەپ ارتقان.
Fortune ساراپشىلارى گۇلجان مولداجانوۆانى وسىنداي تىزىمگە بىرنەشە دۇركىن كىرگىزگەن بولاتىن. 2006 جىلى 22ء-شى ورىندا تۇرسا، 2007 جىلى 20-شى ورىنعا كوتەرىلگەن. ال جاقىندا ەڭ ىقپالدى Forbes جۋرنالى جاريالاعان 100 ەڭ ىقپالدى ايەل تىزىمىندە گۇلجان مولداجانوۆا 37ء-شى ورىنعا يە بولدى. «اليۋمينيي حانىمى» اتانعان گۇلجان مولداجانوۆا كەيىن ولەگ دەريپاسكاعا ورنىن بوساتتى. بۇل تۋرالى «كوممەرسانت» گازەتى: «مولداجانوۆا حانىم باسقارعان ءۇش جىلدىڭ ىشىندە «بازەل» جىلدام ءوستى. 2007 جىلدىڭ قورىتىندىسى بويىنشا، ولاردىڭ وزدەرى بەرگەن مالىمەتتەرگە سايكەس، حولدينگ اكتيۆتەرىنىڭ قۇنى ەكى ەسەگە ءوسىپ، $45 ملرد-قا جەتكەن. ءتۇسىم كولەمى 45%-عا دەيىن ءوسىپ، $ 26،8 ملرد. بولعان. 2008 جىلدىڭ ماۋسىم ايىندا مولداجانوۆا حانىم 2009 جىلدىڭ اقپان ايىندا بىتەتىن ەڭبەك شارتىن تاعى بەس جىلعا سوزۋعا ولەگ دەريپاسكادان ۇسىنىس العانىن ايتقان ەدى» دەپ جازدى.بۇل قىزمەتتەن كەيىن ەسن توبىنا قىزمەتكە كىرىپ، ول جەردە دە باس ديرەكتور بولىپ، تىزگىندى ءوز قولىنا الادى. ىسكەر قىز ءوز ىسىنەن جاڭىلمايدى. بارعان جەرىن جانداندىرىپ، ءىسى وڭعا باسا باستايدى دەرەۋ. ايتپاقشى، ول ءقازىر ءبىزدىڭ «سامۇرىق-قازىنا» ۇلتتىق ءال-اۋقات قورى ديرەكتورلار كەڭەسىنىڭ مۇشەسى دە.
حاتشىدان باس ديرەكتورعا دەيىن:
1966 جىلى الماتى قالاسىندا دۇنيەگە كەلگەن گۇلجان 1989 جىلى كازگۋ-دىڭ فيزيكا فاكۋلتەتىن بىتىرگەن. ال 1998 جىلى ۇكىمەت جانىنداعى قارجى اكادەمياسىن ءتامامداعان. بارا-بارا شەتەلگە شىعىپ، سول جاقتاعى وقۋ ورىندارىن تاۋىسا باستادى...
1994-1995 جىلدارى ماسكەۋ مەملەكەتتىك ۋنيۆەرسيتەتىندە عىلىممەن اينالىسقان. كەيىن 1995 جىلى ولەگ دەريپاسكانىڭ حولدينگىنە كەلىپ، «روساليۋمينپرودۋكت»ء-تىڭ باس ديرەكتورىنىڭ حاتشىسى بولىپ قىزمەتكە تۇرادى. سول كەزدەگى ونىڭ جالاقىسى بار بولعانى 200 اقش دوللارى ەدى. «مەن بۇل جۇمىسىما «تاماق ساتىپ الۋعا جەتەتىن اقشا بەرەتىن قىزمەت» دەپ قاراۋشى ەم» دەپ ەسكە الىپتى ءبىر سۇحباتىندا. كوپ ۇزاماي قىزمەتتە ايى وڭىنان تۋىپ تۇرعان گۇلجان قارجى ديرەكتورىنىڭ كومەكشىسى بولىپ شىعا كەلەدى. ءسويتىپ، «ءسىبىر ءاليۋمينييى» كوممەرسيالىق ديرەكتورى ورىنتاعىنا جايعاستى.
ءبىرازدان سوڭ «بازەل»ء-دىڭ باس ديرەكتورى بولىپ ءبىر-اق قونجيعان گۇلجان «اليۋمينيي حانىمى» اتانىپ، ايداي الەمدى اۋزىنا قاراتتى.
دينارا ىزتىلەۋ
پىكىر قالدىرۋ