كەشەلى بەرى ەل نازارى الماتى وبلىسى جامبىل اۋدانى جاققا اۋدى. وسى اۋداننىڭ ورتالىعى ۇزىناعاش كەنتىنە شقو-دان مال اكەپ ساتپاق بولعان ءۇش بىردەي ازامات وتكەن جەكسەنبىدە ەكى جۇك كولىگىنە تيەلگەن 40 باس ءىرى قارا مالىمەن جوعالدى. تۋىستارى دابىل قاعىپ، ءبىر اپتاعا جۋىق ۋاقىتقا سوزىلعان ىزدەۋ جۇمىستارىنا پوليسيادان بولەك، جوعالعان جىگىتتەردىڭ تۋىستارى، دوستارى، ەرىكتىلەر دە جۇمىلدىرىلدى.
وكىنىشكە وراي، بۇگىن پوليسيا جوعالعان ءۇش جىگىتتىڭ دە قازا بولعانىن، قىلمىسقا قاتىسى بار دەگەن كۇدىكپەن ەكى ازاماتتىڭ تۇتقىندالعانىن حابارلادى. ونىڭ ءوزىن پوليسيا باسشىلىعى مارقۇمداردىڭ تۋىستارىنا عانا ايتقان.
جالپى وسى ءبىر اپتا ۋاقىت ىشىندە نە جامبىل اۋداندىق، نە الماتى وبلىستىق ءىىد تاراپىنان اقپارات قۇرالدارىنا، وسى وقيعاعا الاڭداۋشىلىق بىلدىرگەن جالپى جۇرتشىلىققا رەسمي تۇسىنىكتەمە بەرگەن جان بولمادى. «قامشى»، Baq.kz باستاعان بىرنەشە اقپاراتتىق سايت، 31-ارنا، كتك تەلەارنالارىنىڭ جۋرناليستەرى رەسمي مالىمەتتى كىمنەن الارىن بىلمەي دال بولدى. بۇل جاعداي مەملەكەتتىك ۇيىمداردىڭ قوعامدىق رەزونانس تۋعىزعان وقيعالارعا قاتىستى شۇعىل اقپاراتتىق جۇمىس جۇرگىزۋگە قابىلەتسىز ەكەنىن كورسەتىپ وتىر.
سونىمەن وتكەن جەكسەنبىدە جوعالعان ءۇش ازاماتتىڭ قازا بولعانىن بىلدىك. تەرگەۋ ءجۇرىپ جاتىر ەكەن. ەكى كۇدىكتى تۇتقىندالىپتى. وعان قاتىستى دا وسى وقيعانىڭ باسى-قاسىندا جۇرگەن ازاماتتاردىڭ كۇدىگى كوپ سياقتى. سوندىقتان دا، پوليسيا، باسقا دا مەملەكەتتىك ورگاندار ەلدى قۇلاقتاندىرۋ، تەرىس اقپاراتتاردىڭ تارالۋىنا توسقاۋىل بولۋ جايىن ويلاۋى كەرەك.
ەندى نەگىزگى ماسەلەگە كوشسەك، بۇل جاعداي تەك ءبىر اۋداننىڭ نە وبلىستىڭ شەڭبەرىندە قالاتىن وقيعا ەمەس. زارداپ شەگۋشى تاراپتىڭ اتامەكەنگە كەلگەن قانداستارىمىز ەكەنىن ەسكەرسەك، بۇل وقيعا قوعامدا الەۋمەتتىك ادىلدىك تۇرعىسىنان بەلگىلى ءبىر دەڭگەيدە تەرىس كوزقاراس تۋعىزۋى مۇمكىن. ونىڭ ۇستىنە، ءۇش ازامات مال اكەلگەن ۇزىناعاش بازارىندا الاياقتىق پەن بوپسالاۋ سىندى قىلمىستار بۇعان دەيىن دە بولعانىن، ءتىپتى، بازاردى كىسى توناۋدى كاسىپكە اينالدىرعان توپتار دا جوق ەمەستىگىن ايتىپ جۇرگەندەر بار. سوندىقتان دا، بىرنەشە اقپارات قۇرالىندا جاريالانعان وسى وقيعاعا قاتىستى وبلىس باسشىسى اماندىق عابباس ۇلى دا ەل الدىنا شىعىپ، كوپكە باسۋ ايتۋى، ءتيىستى مەكەمەلەردىڭ جۇمىسىن قاتاڭ باقىلاۋعا الۋى كەرەك سياقتى.
