الماتى وبلىسىنىڭ اكىمى اماندىق باتالوۆ قاراتال وزەنىنىڭ ارنالارىن باقىلاۋ ءۇشىن تىكۇشاقپەن ارالاپ كوردى. جاڭا درەناجدىق كانالدىڭ قۇرىلىسى اۋماعىندا بولىپ، وزەننىڭ بالقاش كولىنە قۇياتىن ارنالارىن تازارتۋدىڭ گيدروتەحنيكالىق شارالارىنىڭ جۇرگىزىلۋ بارىسى تۋرالى ماماندارمەن اڭگىمەلەستى. 

بالقاشقا قۇياتىن ارناسىن قالپىنا كەلتىرۋ جۇمىستارى وبلىس اكىمىنىڭ باستاماسىمەن وسىدان ەكى جىل بۇرىن باستالعان بولاتىن. ول كەزدە ماسەلە عالامدىق دەڭگەيگە كوتەرىلۋ ءقاۋپىنىڭ الدىندا تۇرعان ەدى. كوكتەم كەزىندەگى سۋدىڭ مولايۋىنىڭ سالدارىنان قالىپتاسقان بوگەت وزەن ارناسىنىڭ كوزىن مۇلدە جاۋىپ تاستايتىن. سۋ وزەنگە جەتپەي جايىلىپ، اۋىل شارۋاشىلىعى جەرلەرىن سازعا اينالدىراتىن. بۇل جاعدايدىڭ سالدارىنان جاقىن ماڭداعى اۋىلدارعا بىرنەشە مارتە سۋ جايىلۋ ءقاۋپى دە تۋدى. وعان قوسا بالىق اۋلاۋ سالاسىنا دا زيانىن تيگىزدى. قامىستىڭ تۇبىندە ولگەن بالىقتار جاتاتىن. جەرگىلىكتى شارۋاشىلىقتار بۇرىنعىداي بالىق اۋلاۋدان قالعان-تىن. ال بالقاش كولىنىڭ ءوزى كۇن ساناپ قۇرعاپ بارا جاتتى. جاعداي جەدەل شارالاردى قولعا الۋدى قاجەت ەتتى. سوندىقتان وبلىس باسشىسىنىڭ تاپسىرماسىنا سايكەس ەڭ الدىمەن «قاراتال» مەليوراتيۆتى وتريادى قۇرىلىپ، ارنايى تەحنيكامەن جاراقتاندىرىلدى. وسى شارالار ءۇشىن وبلىستىق بيۋدجەتتەن 200 ملن. تەڭگەدەن استام قارجى ءبولىندى.

«قاراتال» مو ديرەكتورى باقبەرگەن ماديبەكوۆتىڭ حابارلاۋىنشا، 4 ايدان استام ۋاقىتتىڭ ىشىندە ماماندار ۇزىندىعى ءۇش ءجۇز مەتر بولاتىن بوگەتتى جويىپ، ەنى 20 مەترلىك 13 شاقىرىم كانالدى قۇم مەن باتپاق ىشىنەن ارشىپ، قازىپ شىقتى. 10 مىڭ گەكتارلىق جايىلىمدىق جەر قۇرعاتىلىپ، اينالىمعا ەنگىزىلدى.

وسىنداي جۇمىستاردىڭ ناتيجەسىندە سۋى مول وزەن كولگە بارىپ قۇياتىن بولدى، سونداي-اق بالىق شارۋاشىلىعى قايتا جانداندى. بالقاش كولىنە اقبالىق قايتا ورالدى. ال قاراتالدا ءقازىر بەكىرە بالىعىن اۋلايدى. ماماندار مۇنى بالقاشتىڭ قۇتقارىلۋى دەپ اتادى.

بۇگىنگى كۇنى «قاراتال» مامانداندىرىلعان وتريادىنىڭ قىزمەتكەرلەرى ۇزىندىعى 6،5 مەتر بولاتىن ەكىنشى درەناجدىق كانالدى قازۋ ۇستىندە. بۇل جۇمىسقا جاڭا جوعارى تەحنولوگيالى تەحنيكا تارتىلعان. «ۆوتەر ماستەر» دەپ اتالاتىن بۇل تەحنيكا 5 وپەراسيانى ءبىر مەزگىلدە ورىنداپ، تۇتاس ءبىر اۆتوپاركتىڭ كۇشىن الماستىرا الادى. جۇزەتىن ماشينا بەس مەتر تەرەڭدىكتە جۇمىس ىستەي الادى، بوگەتتەردى الىپ تاستايدى، كانال ءتۇبىن تەرەڭدەتەدى، ارنانى كەڭەيتەدى، ءتىپتى دىڭگەك تە قاعا الادى.

مامانداردىڭ ايتۋىنشا، قابىلدانعان شارالار بالقاش كولىنىڭ تاعدىرىنا وڭ اسەر ەتتى. ەندى كولدىڭ سايازدانۋ ءقاۋپى سەيىلدى. ءبىراق بالقاشتى جانە تۇتاس ەكوجۇيەنى قۇتقارۋ جۇمىستارى جالعاسا بەرمەك.

- ەكى كانال جاساپ، دامبانىڭ قۇرىلىسىن جۇرگىزۋ اتقارىلاتىن جۇمىستىڭ كىشكەنتاي بولشەگى عانا. بۇل ءبىر كۇندىك جۇمىس ەمەس. ارنانى تازالاۋ جۇيەلى سيپات الىپ، ونى تۇراقتى تۇردە جۇرگىزۋىمىز كەرەك. جاڭا سۋ شارۋاشىلىعى باعدارلاماسى دا قابىلداناتىن بولادى. جەتىسۋدىڭ وزەندەرى بۇل باعدارلامانىڭ  نەگىزگى نىسانى بولماق. اتالعان جۇمىسقا قازىردەن كىرىسۋىمىز كەرەك، - دەدى وبلىس اكىمى اماندىق باتالوۆ قورىتىندى سوزىندە.