ق ر ىشكى ىستەر ءمينيسترى قالمۇحانبەت قاسىموۆقا
قۇرمەتتى قالمۇحانبەت نۇرمۇحانبەت ۇلى!
الماتى وبلىسى جامبىل اۋدانىنىڭ ورتالىعى ۇزىناعاش كەنتىندە 18 قىركۇيەك كۇنى مال بازارىنا مال اكەلگەن 1979 جىلعى دولدان ۇلى جارقىنبەك، 1973 جىلعى زارلىحان ۇلى مۇقيات پەن ءالىمحان قادىلبەك ەسىمدى ازاماتتاردىڭ جوعالعانىنان حاباردار بولارسىز. جەرگىلىكتى پوليسيا قىزمەتكەرلەرى مەن جوعالعان ازاماتتاردىڭ تۋىستارى، دوستارى مەن ەرىكتىلەر ءۇش ازاماتتى ءبىر اپتا بويى ىزدەستىردى. وكىنىشكە وراي، بۇگىن جوعالعان ءۇش ازاماتتىڭ دا قازا بولعانى حابارلاندى. بەيسەنبى، جۇما كۇندەرى جوعالعان جىگىتتەردىڭ ەكى بىردەي كولىگى تابىلدى، كەشە ۇزىناعاش ماڭىنان جوعالعان جىگىتتەرگە تيەسىلى 40 باس ءىرى قارا مالدىڭ 33ء-ى تابىلعان.
جوعالعان كىسىلەردى ىزدەۋ جۇمىستارىنا الماتى وبلىستىق ءىىد، جامبىل اۋداندىق ءىىب، باسقا دا اۋدانداردىڭ پوليسيا قىزمەتكەرلەرى جۇمىلدىرىلعان. الايدا، ىزدەۋ جۇمىستارىنىڭ ءبىر اپتاعا جۋىق ۋاقىتقا سوزىلۋى پوليسيا قىزمەتكەرلەرىنىڭ كاسىبي بىلىكتىلىگىنە كۇمانمەن قاراۋعا ءماجبۇر ەتىپ وتىر. زات ەمەس، ادام، ءبىر عانا ادام ەمەس، ءۇش بىردەي ازاماتتى، ەكى كولىگى، 40 باس ءىرى قارا مالىمەن الاقانداي اۋدان ىشىندە وسىنشا ۋاقىت ىزدەۋ پوليسيا قىزمەتكەرلەرىنىڭ ەلباسى قويىپ وتىرعان كاسىبي بىلىكتىلىك تالابىنىڭ ۇدەسىنەن شىقپاعانىن كورسەتەدى. بۇل جەردە جوعالعان مال مەن ەكى كولىكتىڭ تابىلۋىن پوليسيا قىزمەتكەرلەرىنىڭ ەڭبەك كورسەتكىشى دەي المايتىنىمىز دا انىق. دالادا جايراپ جاتقان كولىك پەن قاراۋسىز جايىلىپ جۇرگەن مالدى تۇرعىندار كورىپ، حابارلاعان.
جوعالعان ازاماتتاردىڭ تۋىستارى مەن ولاردى ىزدەۋگە اتسالىسقان ەرىكتىلەر دە پوليسيا قىزمەتكەرلەرىنەن وسى وقيعاعا قاتىستى تولىمدى اقپارات الا الماعاندارىنا شاعىمدانۋدا. سونىڭ سالدارىنان ولاردىڭ اراسىندا «بۇل ۇيىمداسقان قىلمىستىق توپتىڭ ءىسى ەكەن. پوليسيانىڭ ول توپقا شاماسى كەلمەيتىن كورىنەدى» دەگەن دە اڭگىمە تارادى. وسى ورايدا، اتالعان وقيعا تۋرالى وقىرمانعا وبەكتيۆتى اقپارات بەرۋ ماقساتىندا الماتى وبلىستىق ءىىد باسپا ءسوز قىزمەتىنەن دە ىزدەۋ جۇمىستارىنىڭ بارىسى تۋرالى مالىمەت الا الماعانىمىزدى ايتا كەتكەن ءجون.
قۇرمەتتى قالمۇحانبەت نۇرمۇحانبەت ۇلى!
تەك الماتى وبلىسى اۋماعىندا عانا ەمەس، بۇكىل رەسپۋبليكا جۇرتشىلىعى كوز تىككەن بۇل وقيعانىڭ قانشالىقتى قوعامدىق رەزونانس تۋدىرعانى تۋرالى ايتىپ جاتۋ ارتىق بولار. سوندىقتان دا سىزدەن وسى ءىستىڭ ءمان-جايىن انىقتاپ، تەرگەۋ بارىسىن جەكە باقىلاۋىڭىزعا الۋىڭىزدى ءوتىنىپ سۇرايمىز. قوعام نازارى الداعى تەرگەۋ شارالارىنا دا ءجىتى باعىتتالاتىنىن، مارقۇمداردىڭ تۋىستارى، دوستارى قىلمىسقا قاتىسى بار تۇلعالاردىڭ انىقتالىپ، تولىقتاي جازالانۋىن تالاپ ەتەرى ءسوزىز. تەرگەۋ كەزىندە زاڭدىلىقتىڭ، پروسەسسۋالدىق تالاپتاردىڭ ساقتالماۋى سىندى كەمشىلىكتەر ورىن السا، جابىرلەنۋشى تاراپتىڭ پوليسيا قىزمەتىنە كۇدىگىن كۇشەيتىپ، ءتىپتى، الەۋمەتتىك ارازدىق تۋعىزاتىن جاعدايلارعا الىپ بارۋى مۇمكىن.
باسقا اقپارات قۇرالدارىمەن بىرگە، Qamshy.kz اقپاراتتىق پورتالى دا وسى ءىستى ءجىتى باقىلاپ، تەرگەۋ بارىسىن قاداعالايتىنىن ەسكەرتەمىز.
