قازاقتىڭ ءبىرتۋار ۇلى، ۇلت رۋحانياتىنىڭ جاناشىرى اسقار ءانۋار ۇلى جاكۋلين اقپان ايىنىڭ باسىندا اۋىر ناۋقاستان كوز جۇمعان بولاتىن. حال ۇستىندە جاتقان اسەكەڭ سوندا جارى جاينا جاكۋليناعا جۇرەكجاردى سوزدەرىن ءتىزىپ حات جازعانىن دا بىلەمىز. اسىلدىڭ سىنىعى، تەكتىنىڭ تۇياعى اسقارداي ازاماتىنان ايرىلعان مارقۇمنىڭ جارى جاينا الەۋمەتتىك جەلىدە اسقارسىز وتكەن كۇندەرى تۋرالى تولعانىستارى مەن جاقىن دوستارى مەن جاناشىر جاندارعا ريزاشىلىق بىلدىرگەن حاتىن جاريالادى. تومەندە جاينا جاكۋلينانىڭ جان جارىنىڭ وشپەس رۋحىنا ارناعان حاتىن نازارلارىڭىزعا ۇسىنىپ وتىرىز.

مەن ءوزىمنىڭ سۇيىكتى جارىم اسقار جاكۋليندى ەسكە الامىن. وتكەن بىرنەشە ايدىڭ ىشىندە ءبىز وزگەشە ءبىر كۇندەردى باستان وتكەردىك. وسى ساتتە مەن بارلىق بىزگە كوڭىل بولگەن، جاقىننان جاردەمشى بولعان دوستارىما العىسىمدى بىلدىرەمىن. سەندەر ماعان شىنايى ماحاببات پەن جىلۋلىقتى سەزىندىردىڭدەر.

سونىمەن قاتار، قول قۋسىرىپ قاراپ تۇرىپ تا سول ءبىر قۇدىقتاعى قۇردىمعا تاس اتقاندارعا دا شەكسىز العىسىمدى ايتامىن. سەندەر مەنى ودان ءارى ەرجۇرەك، قايراتتى ەتىپ باۋلىدىڭدار.

اسقار ەكەۋمىز چيڭحۋا ۋنيۆەرسيتەتىندە تانىستىق. ءسوز بايلاستىق. ۇلتىمىز ۇقساماعان بىزدەر ون ەكى جىلدان كەيىن عانا ەكى جاق اتا-انانىڭ ريزاشىلىعىنا قول جەتكىزدىك. ءبىز بىر-بىرىمىزگە كەرەمەت عاشىق بولدىق، سەنىمدى سەرىك، اتا-انا بولدىق، قىزمەتتەگى قاناتتاسپىز، ءتىپتى ەڭ جاقسى دوستاردان بولا بىلدىك. ءومىردىڭ اششى-تۇششىسىن بىرگە تاتتىق، قاس قاعىم ساتتەي بولسا دا ءبىز اللاعا مىڭ مارتە العىس ايتامىز. ەگەر ومىرگە قايتا كەلسەك ءبىز تاعى تاڭشولپاننىڭ اينالاسىنان ورىن تاپقان ەرلى-زايىپتى بولعاندى قالار ەدىك.

«مەن ءۇشىن ومىرىمدەگى ەڭ كەرەمەت وقيعا - قازاقستاننىڭ تاۋەلسىزدىك الۋى، ەڭ ۇلى شەشىمىم - قازاقستانعا قونىس اۋدارۋىم»... اسقار كوكىرەگىن وت كەرنەپ قۇلشىندى، تالپىندى، كۇرەستى، ءانىن اسقاقتاتتى، قاجىرلى بولدى، ول وتانىنا قارىزدار ەمەس، ءوز ومىرىنە دە قارىزدار ەمەس،

اسقار كەتتى. ارتىندا ۇلى مەن قىزى قالدى. اركەز قىزىمنىڭ جانارى جاسقا بويالىپ، ۇلىم اكەسىنىڭ كەسكىنىن كورگەنىندە دە ءبىزدىڭ ەندىگى كەشەتىنىمىز توزاق ازابىنداي ەلەستەيدى.

اسقار كەتتى. ارتىنا ول اقسۋاتىن دا قالدىرىپ كەتە بەردى. ونىڭ ورىندالماعان ۇلى ءىسى قالدى، مەن ونىڭ ساۋىتىن جامىلىپ تۇلپارىنا ءمىنىپ ەشتەڭەدەن جاسقانباي كۇرەسە بەرەمىن!

اسقار كەتتى. ارتىندا قالعانى – ونىڭ رۋحى مەن ارمانى، ونىڭ اقىل-پاراساتى مەن ادىلەتتىلىگى، سەرى بەينەسى مەن اسقاق كۇلكىسى، ونى سۇيەتىن حالقىنىڭ ساناسىندا قالقىعان كەرىم تۇلعاسى.

ىلايىم اللا اسقاردىڭ جانىن جانناتتا قىلعاي! ونىڭ دوستارى مەن وتباسىنا اللام جار بولسىن، اللا ونىڭ جان تانىمەن سۇيەتىن ۇلتى مەن وسى كيەلى توپىراعىن امان ساقتاسىن! اۋمين!

جاينا،

2016 جىلدىڭ 12 قىركۇيەگى، قۇربان ايت كۇنى

الماتى.